İyulun 9-da Azərbaycan Dillər Universitetində (ADU) ali təhsildə müasir pedaqoji yanaşmaların tətbiqinin genişləndirilməsi, professor-müəllim heyətinin metodiki bilik və bacarıqlarının təkmilləşdirilməsi, eləcə də nəticəyönümlü tədris modelinin effektiv tətbiqinə dəstək məqsədilə Təlim və Metodologiya Mərkəzi ilə Qərb ölkələri üzrə Regionşünaslıq kafedrasının birgə təşkilatçılığı ilə "Nəticəyönümlü tədris: təlim nəticələrinin hazırlanması və qiymətləndirmə ilə uyğunlaşdırılması" mövzusunda birgünlük təlim keçirilib.
ADU-dan “Tehsil365” ə bildirilib ki, tədbiri Qərb ölkələri üzrə Regionşünaslıq kafedrasının müdiri, professor Sevdagül Əliyeva açaraq iştirakçıları salamlayıb və nəticəyönümlü tədris yanaşmasının müasir ali təhsil sistemində strateji əhəmiyyətindən bəhs edib. O bildirib ki, bu model tələbələrin bilik, bacarıq və səriştələrinin sistemli şəkildə formalaşdırılmasına, müəllimlərin isə tədris prosesini daha məqsədyönlü planlaşdırmasına imkan yaradır.
Təlim Qərb ölkələri üzrə Regionşünaslıq kafedrasının baş müəllimi, tarix üzrə fəlsəfə doktoru Bəyim Abdulla tərəfindən keçirilib. Təlim zamanı nəticəyönümlü tədrisin konseptual və metodoloji əsasları təqdim olunub, bu yanaşmanın beynəlxalq ali təhsil məkanında tətbiqi, kurikulumların hazırlanması və tədrisin planlaşdırılmasındakı rolu izah edilib.
Təqdimat çərçivəsində təlim nəticələrinin hazırlanmasının əsas prinsipləri, nəticəyönümlü kurikulumun formalaşdırılması mərhələləri, Geriyə Kurs Dizaynı (Backward Design) modeli, Konstruktiv Uyğunlaşdırma (Constructive Alignment) konsepsiyası, Bloom taksonomiyası və SMART yanaşmasının praktik tətbiqi geniş şəkildə şərh olunub. Vurğulanıb ki, proqram, fənn və mövzu səviyyəsində müəyyən edilən təlim nəticələri qarşılıqlı şəkildə əlaqələndirilməli, onların hər biri uyğun tədris metodları və obyektiv qiymətləndirmə vasitələri ilə təmin edilməlidir. Eyni zamanda, təlim nəticələrinin yazılmasında fəal fellərin seçilməsi, ölçüləbilən nəticələrin formalaşdırılması və qiymətləndirmə meyarlarının hazırlanması ilə bağlı metodiki tövsiyələr iştirakçıların diqqətinə çatdırılıb.
Təlimin praktik hissəsi interaktiv formatda təşkil olunub. İştirakçılar kiçik qruplara bölünərək "Konstruktiv uyğunlaşma zənciri" adlı praktik tapşırıq üzərində çalışıblar. Qrup işi zamanı müəllimlər tədris etdikləri fənlər üzrə mövcud təlim nəticələrini təhlil edib, onları Bloom taksonomiyasının idrak səviyyələri və SMART meyarları baxımından qiymətləndiriblər. Daha sonra həmin nəticələrə uyğun tədris fəaliyyətləri, öyrənmə strategiyaları və qiymətləndirmə tapşırıqları hazırlayıblar. Hazırlanan nümunələr təqdim olunaraq müxtəlif fənlər üzrə tətbiq imkanları müqayisəli şəkildə müzakirə edilib.
Təlim müddətində iştirakçılar tərəfindən nəticəyönümlü tədrisin tətbiqində qarşıya çıxan praktik məsələlər, qiymətləndirmə alətlərinin seçilməsi, öyrənmə nəticələrinin ölçülməsi və müasir tədris metodlarının tətbiqi ilə bağlı çoxsaylı suallar səsləndirilib, mövzu ətrafında geniş fikir mübadiləsi aparılıb. Təlimin interaktiv formatı iştirakçıların mövzuya fəal cəlb olunmasına, nəzəri biliklərin praktik fəaliyyətlə əlaqələndirilməsinə və peşəkar təcrübə mübadiləsinin aparılmasına əlverişli şərait yaradıb.
Tədbirin sonunda Təlim və Metodologiya Mərkəzinin rəhbəri Mülayim Bağırova çıxış edərək nəticəyönümlü tədris modelinin universitetdə keyfiyyət təminatı sisteminin təkmilləşdirilməsi baxımından mühüm əhəmiyyət daşıdığını bildirib. O qeyd edib ki, bu istiqamətdə keçirilən metodiki təlimlər professor-müəllim heyətinin peşəkar inkişafına, müasir tədris texnologiyalarının mənimsənilməsinə və təhsil proqramlarının beynəlxalq keyfiyyət standartlarına uyğunlaşdırılmasına mühüm töhfə verir. Mülayim Bağırova təlimin təşkilində əməyi olan bütün əməkdaşlara təşəkkürünü bildirib.
Təlim müzakirələr və sual-cavab sessiyası ilə başa çatıb. İştirakçılar tədbirin praktik əhəmiyyətini yüksək qiymətləndirərək əldə etdikləri biliklərin tədris prosesində tətbiqinin vacibliyini vurğulayıblar. Sonda təlim proqramını uğurla başa vuran iştirakçılara sertifikatlar təqdim olunub.