Beynəlxalq Muğam Mərkəzinin Cahangir Cahangirov adına Xoru Türkiyənin İstanbul şəhərində keçirilən IV Beynəlxalq İstanbul Xor Festivalında uğurla iştirak edərək Azərbaycanı beynəlxalq musiqi platformasında layiqincə təmsil edib.
“Tehsil365” xəbər verir ki, “Dünyanın səsləri İstanbulda birləşir!” şüarı ilə təşkil olunan festival Türkiyədən və dünyanın müxtəlif ölkələrindən peşəkar və həvəskar xor kollektivlərini bir araya gətirib.
Festivalın konsert proqramları İstanbulun tanınmış konsert salonlarında və açıq hava məkanlarında təşkil olunub. Cahangir Cahangirov adına Xorun təqdim etdiyi repertuar tamaşaçılar tərəfindən yüksək qiymətləndirilib. Kollektiv Azərbaycan milli xor sənətinin zəngin ənənələrini və musiqi mədəniyyətini beynəlxalq auditoriyaya yüksək peşəkarlıqla təqdim edib.
Xorun bədii rəhbəri, Əməkdar müəllim, Prezident mükafatçısı Təranə Yusifova festivalda Azərbaycanı təmsil etməkdən qürur duyduqlarını bildirib. O, kollektivə göstərilən diqqət və dəstəyə görə Mədəniyyət Nazirliyinə dərin minnətdarlığını ifadə edib.
Qeyd edək ki, Cahangir Cahangirov adına Xorun beynəlxalq festivallarda iştirakı Azərbaycan xor sənətinin dünyada tanıdılması, milli musiqi irsinin təbliği və müxtəlif ölkələrin musiqi kollektivləri ilə yaradıcılıq əlaqələrinin genişləndirilməsi baxımından mühüm əhəmiyyət daşıyır.