“Azərbaycan ədəbiyyatında bir çox mövzular var ki, onlar həm keçmişdə, həm də bu gün geniş şəkildə işlənib. Tarixi mövzular, milli kimlik, müharibə, sosial problemlər və mədəniyyətimizlə bağlı məsələlər ədəbiyyatımızda daha çox müraciət olunan mövzulardandır”.
Bu fikirləri “Tehsil365”ə açıqlamasında psixoloq, filosof və yazıçı Rövşən Abdullaoğlu bildirib.
Onun sözlərinə görə, müasir Azərbaycan ədəbiyyatının bu gün ən çox ehtiyac duyduğu istiqamətlərdən biri insana və cəmiyyətə yeni baxışdır.
“Lakin düşünürəm ki, müasir Azərbaycan ədəbiyyatının bu gün ən çox ehtiyac duyduğu istiqamətlərdən biri insana və cəmiyyətə yeni baxışdır. Müasir insanın daxili aləmi, tənhalığı, kimlik böhranı, cəmiyyətə adaptasiyası, travmaları, eləcə də ekzistensial mövzular – həyatın mənası, mənasızlığı, insanın cəmiyyətdə və həyatda yeri kimi məsələlər daha çox qələmə alınmalıdır.”
Yazıçı hesab edir ki, texnologiyanın dəyişdirdiyi müasir cəmiyyət və insanın bu mühitdə yeri də ədəbiyyatda daha geniş işlənməli mövzulardandır.
“Texnologiyanın dəyişdirdiyi müasir cəmiyyət, texnoloji mühitdə insanın yeri də yeni mövzulardır. Bu, insana fərqli rakursdan yanaşmaqdır. Düşünürəm ki, bu mövzular müasir ədəbiyyatımızda kifayət qədər işlənməyib və daha dərin, daha bədii şəkildə ifadə olunmalıdır.
Yazıçı yalnız hadisəni danışmamalıdır, eyni zamanda insan ruhunda, beynində baş verən hadisələri, keçmişin və gələcəyin insana təsirini, gələcəklə bağlı qorxuları, gələcəklə bağlı ümidlərin təsirini də qələmə almalıdır.”
O vurğulayıb ki, müharibə mövzusu ilə yanaşı, müharibədən sonrakı nəslin düşüncələri və müharibənin gələcək nəsillərə təsiri də bədii əsərlərdə əksini tapmalıdır.
“Biz müharibədən yazırıq, lakin müharibədən sonrakı nəslin düşüncələri, müharibənin gələcək nəsillərə təsiri də bədii şəkildə işlənməlidir. Psixoloji dərinliyə malik ədəbiyyata, daha cəsarətli mövzulara ehtiyac var.”
Yazıçı hesab edir ki, bu mövzular dünya oxucusunun anlaya biləcəyi formada, ümumbəşəri dildə təqdim olunmalı və milli dəyərlərlə uzlaşdırılmalıdır.
“Eyni zamanda bu mövzular dünya oxucusunun anlaya biləcəyi formada, ümumbəşəri dildə təqdim olunmalıdır. Mövzularımız və onların təqdimat forması yalnız lokal çərçivədə qalmamalıdır.
Burada vacib məqam ondan ibarətdir ki, yenilik milli köklərdən uzaqlaşmaq demək deyil. Müasir dövrün tələblərinə cavab vermək, insana yeni baxış gətirmək milli dəyərlərdən imtina etmək anlamına gəlmir
Əgər ölkə ədəbiyyatını dövrün tələblərinə uyğunlaşdırmaq istəyiriksə, həmişəyaşar, heç vaxt köhnəlməyən mövzulara müraciət etməliyik. Bu mövzular insanın psixoloji və mənəvi dərinliyi ilə bağlıdır. Ekzistensial mövzular da məhz bu kateqoriyaya daxildir. Onlar hər zaman aktual olub, insan üçün dəyər daşıyıb və bütün insanların maraq dairəsindədir.
Yeni mövzulara Azərbaycan insanının baxış bucağından yanaşmaq, bu mövzularda milliliyi, milli üslubu, özünəməxsus təfəkkürü və baxış tərzini qorumaq vacibdir.”
Sonda yazıçı qeyd edib ki, müasir ədəbiyyatda yeni mövzulara müraciət edilərkən milli kimliyin və özünəməxsus baxış tərzinin qorunması xüsusi əhəmiyyət daşıyır.