“İnsanların dəriyə qulluq zamanı ən çox etdiyi səhvlər dərinin tipini nəzərə almadan məhsul seçmək, sosial şəbəkələrdə gördükləri tövsiyələri kor-koranə tətbiq etmək, SPF-dən istifadə etməmək, üzü həddindən artıq yumaq və eyni anda çox aktiv tərkibli məhsullardan istifadə etməkdir”.
Bu fikirləri “Tehsil365”ə açıqlamasında dermatoloq Aygün Mustafayeva bildirib.
Onun sözlərinə görə, yanlış qulluq üsulları dəridə müxtəlif problemlərin yaranmasına səbəb ola bilər.
“Bu yanlışlıqlar dərinin qoruyucu baryerinin zədələnməsinə, quruluq, qıcıqlanma, sızanaqların artması, piqment ləkələri və hətta allergik reaksiyalara səbəb ola bilər”.
O qeyd edib ki, düzgün dəriyə qulluq sadə prinsiplərə əsaslanır.
“Dəri tipinə uyğun təmizləyici vasitə seçmək, gündəlik nəmləndirici və SPF 30–50 günəş qoruyucusundan istifadə etmək, yeni məhsulları ehtiyatla tətbiq etmək və dəri problemi olduqda özbaşına müalicə əvəzinə dermatoloqa müraciət etmək vacibdir”.
Dermatoloq vurğulayıb ki, sağlam dəri üçün ən yaxşı yanaşma fərdi qulluqdan keçir.
“Unutmayaq ki, sağlam dəri üçün ən yaxşı qulluq fərdi yanaşmadır”.