Məktəbəqədər təhsil sahəsində tətbiq edilən yeni maliyyələşmə modeli çərçivəsində özəl bağçalarda xidmət haqlarının artımı məsələsinə münasibət bildirilib.
“Tehsil365” xəbər verir ki, Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu məktəbəqədər təhsil sahəsində valideyn-özəl-dövlət əməkdaşlığına əsaslanan maliyyələşmə modelinin tətbiqi nəticəsində bağçalarda süni qiymət artımı məsələsinə münasibət bildirib.
“Azərbaycan müəllimi”nin məlumatına görə, V.Yaqublu bildirib ki, özəl müəssisə xidmət haqqını artırdıqca onun müsabiqə qalibi olma, təhsil alan uşaq qazanmaq şansı azalır.
“Bunu özəl müəssisələr yaxşı bilirlər. Hesab edirəm ki, burada elə bir güclü qiymət artımı olmayacaq”, – deyə direktor müavini qeyd edib.
Vəfa Yaqublunun sözlərinə görə, valideynlərin daha çox seçimi olacaq və onlar bir neçə müəssisə arasından daha uyğun xidmət haqqı təklif edənlə müqavilə bağlaya biləcəklər.