Azərbaycan-Fransız Universitetinin (UFAZ) kimya müəllimi Samir Kərimovun həmmüəllifi olduğu "İonlaşdırıcı şüalanma təsiri altında etanolda p,p′-DDT-nin transformasiyası: Mexanizmin və çevrilmə məhsullarının GC-MS vasitəsilə keyfiyyət xarakteristikası" adlı elmi məqalə dünyanın ən nüfuzlu elmi nəşrlərindən biri olan Journal of Hazardous Materials jurnalında dərc olunub. Ətraf mühit elmləri, ekoloji mühəndislik və təhlükəli materiallar sahəsində dünyanın ən nüfuzlu elmi nəşrlərindən biri hesab olunan, 10.6 impakt faktora malik olan jurnal Q1 kateqoriyasına daxildir.
UFAZ-dan “Tehsil365” ə bildirilib ki,Tədqiqat çərçivəsində uzun müddət ətraf mühitdə qalaraq canlı orqanizmlər və ekosistemlər üçün ciddi təhlükə yaradan “p,p′-DDT” pestisidinin ionlaşdırıcı qamma şüalanması vasitəsilə etanolda çevrilməsi prosesi araşdırılıb. Alimlər qamma şüalanmasının təsiri ilə DDT-nin 99.99%-dən çoxunun əlavə kimyəvi reagentlərdən istifadə edilmədən parçalandığını nümayiş etdiriblər. Eyni zamanda, qaz xromatoqrafiyası-kütlə spektrometriyası (GC-MS) üsulu ilə əmələ gələn çevrilmə məhsulları müəyyən edilib, reaksiyanın mexanizmi izah olunub və prosesin toksikliyin əhəmiyyətli dərəcədə azalmasına səbəb olduğu göstərilib. Bu yanaşma davamlı üzvi çirkləndiricilərin ekoloji cəhətdən təhlükəsiz zərərsizləşdirilməsi istiqamətində perspektivli həll kimi qiymətləndirilir.
Məqalə Birləşmiş Ərəb Əmirlikləri Universiteti (UAEU) və Azərbaycan Dövlət Neft və Sənaye Universitetinin (ADNSU) Dayanıqlı İnkişaf Məqsədləri üzrə Birgə Tədqiqat Proqramı çərçivəsində həyata keçirilən elmi araşdırmaların nəticəsidir. Layihənin əsas məqsədi ətraf mühitin mühafizəsi və çirklənmənin aradan qaldırılması üçün innovativ və dayanıqlı texnologiyaların hazırlanmasına töhfə verməkdir.
Samir Kərimovu bu mühüm elmi nailiyyət münasibətilə təbrik edir, gələcək elmi fəaliyyətində yeni uğurlar arzulayırıq.
Məqalənin tam mətni ilə keçid vasitəsilə tanış ola bilərsiniz: https://www.sciencedirect.com/science/article/pii/S030438942601959X?via%3Dihub