Turizm sektorunda peşəkar kadr hazırlığı və universitet məzunlarının əmək bazarına inteqrasiyası prioritet istiqamətlərdən biri olaraq qalır. Müasir dövrdə turizm təhsilinin keyfiyyəti yalnız nəzəri biliklərlə deyil, məzunların məşğulluq göstəriciləri, praktiki hazırlığı və dəyişən qlobal trendlərə uyğun bacarıqları ilə də qiymətləndirilir. Bu baxımdan ali təhsil müəssisələri əmək bazarının tələblərinə uyğun yeni yanaşmalar tətbiq edir, işəgötürənlərlə əməkdaşlığı genişləndirir və tələbələrin beynəlxalq təcrübə imkanlarını artırır.
Azərbaycan Turizm və Menecment Universitetindən “Tehsil365”in sorğusuna cavab olaraq bildirilib ki, turizm kadrlarının hazırlanması üçün tədris proqramlarında rəqəmsal texnologiyalar, süni intellekt, dayanıqlı turizm, rəqəmsal marketinq, risklərin idarə olunması və praktiki bacarıqların inkişafına daha çox yer verilməsi vacibdir. Universitetdə tətbiq olunan istehsalat təcrübələri və sektorla birbaşa əməkdaşlıq isə məzunların turizm sənayesində uğurlu karyera qurmasına töhfə verir. Universitet məzunlarının məşğulluq səviyyəsi təhsil keyfiyyətinin əsas göstəricilərindən biri hesab olunur. Bu məqsədlə əmək bazarı mütəmadi təhlil edilir, işəgötürənlərlə sıx əməkdaşlıq qurulur və məzunların karyera inkişafı izlənilir. Tələbələrin təhsil müddətində istehsalat təcrübəsinə cəlb olunması, hotel və turizm müəssisələri ilə əməkdaşlıq, karyera yarmarkalarının təşkili və işəgötürənlərlə birbaşa əlaqələrin yaradılması onların məzun olduqdan sonra sektora inteqrasiyasını asanlaşdırır. Məzunların əhəmiyyətli hissəsi hotellərdə, turizm şirkətlərində, restoranlarda, dövlət qurumlarında və beynəlxalq qonaqpərvərlik şəbəkələrində uğurla fəaliyyət göstərir.
Qeyd edək ki, uzunmüddətli xarici istehsalat təcrübəsi proqramı Azərbaycan ali təhsil müəssisələri arasında ilk dəfə Azərbaycan Turizm və Menecment Universitetində tətbiq olunub. Belə ki, tələbələr hər il Türkiyənin müxtəlif beşulduzlu hotellərində 5-6 aylıq istehsalat təcrübəsində iştirak edirlər.
Müasir dövrdə turizm təhsili sürətlə dəyişən qlobal trendlərə uyğun inkişaf etməlidir. Tədris proqramlarında rəqəmsal texnologiyalar, süni intellekt, onlayn bronlamaq (rezervasiya) sistemləri, rəqəmsal marketinq, dayanıqlı turizm, yaşıl iqtisadiyyat, böhran və risklərin idarə olunması kimi mövzuların payının artırılması vacibdir. Bununla yanaşı, layihəəsaslı tədris, dual təhsil modeli, praktik məşğələlərin genişləndirilməsi, sahibkarlıq bacarıqlarının inkişaf etdirilməsi və xarici dil hazırlığının gücləndirilməsi gələcəyin turizm mütəxəssislərinin beynəlxalq əmək bazarında rəqabət qabiliyyətini daha da artıracaq.