Süni intellekt və rəqəmsal texnologiyalar dənizçilik sektorunun gələcəyini formalaşdıran əsas amillərdən birinə çevrilir. Bu texnologiyalar insan intellektinə xas proseslərin maşınlar və kompüter sistemləri vasitəsilə həyata keçirilməsinə imkan verir.
“Tehsil365” xəbər verir ki, bu sözləri Bakıda keçirilən “Təhlükəsiz keçid 2026” forumunda Dəniz Təhlükəsizliyi və Ətraf Mühitin Mühafizəsi Administrasiyasının rəhbəri, Dünya Dənizçilik Universitetinin (WMU) professoru Dimitrios Dalaklis deyib.
O qeyd edib ki, dənizçilik sahəsində süni intellektin tətbiqi üçün geniş imkanlar mövcuddur. Ekspert sistemləri, təbii dilin emalı, nitq və təsvirlərin tanınması, eləcə də kompüter görməsi kimi texnologiyalar gəmiçilikdə təhlükəsizlik və səmərəliliyin artırılmasına mühüm töhfə verir.
“Bu gün müasir gəmilərdə istifadə olunan sensor texnologiyaları kifayət qədər yüksək inkişaf səviyyəsinə çatıb. Növbəti mərhələdə əsas diqqət mövcud məlumatların daha səmərəli emalına və onlardan düzgün istifadə edilməsinə yönəlməlidir. Bu baxımdan, qabaqcıl proqram təminatının və süni intellekt alətlərinin tətbiqi xüsusi əhəmiyyət daşıyır. Süni intellekt vasitəsilə gəmilər ətraf mühit haqqında məlumatları daha sürətli təhlil edə, potensial riskləri əvvəlcədən müəyyənləşdirə və naviqasiya prosesinin daha təhlükəsiz həyata keçirilməsinə dəstək verə bilər. Bu texnologiyalar həmçinin insan səhvlərinin azaldılmasına, əməliyyat səmərəliliyinin artırılmasına və dəniz nəqliyyatında təhlükəsizlik standartlarının daha da təkmilləşdirilməsinə imkan yaradır”, - deyə professor bildirib.