İlahiyyatçı Hacı Təyyar Hüseynli müasir dövrdə dindar olmağın yalnız ibadətlə məhdudlaşmadığını bildirərək qeyd edib ki, yüksək əxlaqi dəyərlər, etik və estetik yanaşma, sağlam düşüncə və nümunəvi davranış İslam anlayışının əsasını təşkil edir.
“Tehsil365”-ə açıqlamasında Hacı Təyyar Hüseynli bildirib ki, müasir dövrdə dindar olmaq yüksək əxlaqi dəyərləri - etik, estetik, yenilikçi bütün ictimai sosial, sağlam düşüncə, nümunəvi bir davranış İslam deməkdir.
O qeyd edib ki, İslam dininin ilkin bütün dünyaya olan İlahi elçi tərəfindən mesajı əxlaq olub.
“Maraqlansanız görərsiniz ki, birinci müraciət “Mən əxlaqi dəyərləri kamilləşdirmək, təkmilləşdirmək üçün İlahi göndərilmiş elçiyəm” - budur. Fikir verirsiniz, əxlaq nə dərəcədə önəmlidir. Və yaxud da İslam dinində var ki, əxlaqı, etikası, yüksək mənəvi dəyərləri, ədəbi olmayan insana cənnət haramdır. Konkret olaraq deyilir ki, əxlaqı olmayana cənnət haramdır”, - deyə o bildirib.
İlahiyyatçı vurğulayıb ki, təhsildə istifadə etdiyimiz “ədəbiyyat” sözünün kökündə “ədəb” anlayışı dayanır.
“Ədəbiyyat sözünün kökündə “ədəb” var. Yəni ədəb elmdən öncədir, əqidənin kökü deməkdir. İslam dini də müasir müsəlmanın birinci növbədə elmi, ədəbi, bütün mənəvi dəyərləri, nümunəvi insan siması olaraq dünyaya təqdimatı, sülhsevərliyi, bütün mənalarda müsəlman müsbətləri ilə fərqlənməlidir”, - deyə o qeyd edib.
O bildirib ki, dünyanın hər bir yerində cəmiyyətinə, ətrafına, millətinə, xalqına ləyaqətlə və sədaqətlə faydalı olan insan yüksək insani keyfiyyətləri ilə seçilir.
“Məsələ burasındadır ki, dünyanın hər bir yerində o yaxşı insan dediyimiz, gözəl insan dediyimiz - cəmiyyətinə, ətrafına, millətinə, xalqına ləyaqətlə, sədaqətlə faydalı olan bir insan varsa onun adı müsəlmandır”, - deyə ilahiyyatçı bildirib.
İlahiyyatçı əlavə edib ki, müsəlmanın ibadəti də şərtdir və ibadətlərin mahiyyətində yaxşı insan olmaq anlayışı dayanır.
“Mənim bir şəxsi yanaşmam var: “Yaxşı insanlara ibadət yaraşır. Əvvəl insan yaxşı olmalıdır, öz üzərində bütün müsbətləri formalaşdırmalıdır, sonunda müsbət bir bəndə olaraq ibadətdə üzü ağ olaraq yaradanla danışmalıdır. Bütün ibadətlərin özündə də yaxşılıqlar var”, - deyə o bildirib.
O qeyd edib ki, namaz, oruc, xüms, zəkat, həcc, cihad və digər ibadətlərin mahiyyətində insanın mənəvi inkişafı və yaxşılıq dayanır.
“Bütün müsbət nələr varsa onun adı ibarətdirsə, ibadətin də adı yaxşı insan olmaqdır. Yaxşı insan olmaq, nümunəvi insan olmaq, xeyirli insan olmaq bəşəriyyətə, insaniyyətə, cəmiyyətə, ətrafa olan bütün müsibətləri özündə formalaşdıra bilən insan tipinə müsəlman deyirlər, dindar deyirlər. Yəni ən yaxşı insan dindardır, ən yaxşı dindar yaxşı insandır”, - deyə ilahiyyatçı vurğulayıb.
Sonda ilahiyyatçı Təhsil365 İnformasiya Agentliyinin fəaliyyətini yüksək qiymətləndirərək bildirib ki, agentlik elmə, təhsilə, elm adamlarına və ictimai xadimlərə diqqət göstərir, sağlam fikirlərin cəmiyyətə çatdırılmasına töhfə verir.
“Siz də Təhsil365 İnformasiya Agentliyi olaraq elmə, təhsilə, elm adamlarına, ictimai xadimlərə eyni zamanda mənim fikirlərimi dəyərləndirirsiniz. Mən də sağlam fikirləri cəmiyyətimizə çatdırmaq üçün sizin İnformasiya Agentliyini dəyərləndirirəm. Sizdən çox razıyam, sizin də davranışlarınız elə azərbaycanlı müsəlman, dindar azərbaycanlı keyfiyyətlərini tamamlayan bir fəaliyyət sahəsindəsiniz. Kollektiv olaraq fikirlərimə dəyər verdiyiniz üçün təşəkkürümü bildirirəm”, - deyə o qeyd edib.