Azərbaycan Memarlıq və İnşaat Universitetinin (AzMİU) tələbələri Türkiyənin aparıcı kommunal xidmət qurumlarından biri olan İstanbul Böyükşəhər Bələdiyyəsinə bağlı İstanbul Su və Kanal İdarəsində (İSKİ) təşkil olunan beynəlxalq yay təcrübə proqramında iştirak edirlər.
Universitetdən “Tehsil365”ə bildirilib ki, proqram ölkədə su təsərrüfatı, kanalizasiya və ekoloji infrastruktur sahələrində həyata keçirilən inkişaf strategiyaları baxımından mühüm əhəmiyyət daşıyır. Prezident İlham Əliyevin təsdiq etdiyi “Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2025-2030-cu illər üçün Dövlət Proqramı” çərçivəsində müasir texnologiyaların tətbiqi və yüksəkixtisaslı mühəndis kadrların hazırlanması prioritet istiqamətlərdən biridir. Bu baxımdan tələbələrin İSKİ-də qazandıqları praktiki təcrübə gələcəkdə ölkəmizdə həyata keçiriləcək infrastruktur layihələri üçün peşəkar insan resurslarının formalaşmasına töhfə verir.
Təcrübə proqramına AzMİU-nun bakalavriat və magistratura səviyyələrində təhsil alan tələbələri cəlb olunublar. Proqramda İnşaat mühəndisliyi, Şəhər infrastrukturunda ağıllı texnologiyalar, Su ehtiyatlarının idarə olunması və mühafizəsi, Meliorasiya sistemləri, Tullantıların emal texnologiyaları və Ekologiya mühəndisliyi ixtisasları üzrə təhsil alan tələbələr iştirak edirlər. Təcrübə müddətində iştirakçılar İstanbulun su və kanalizasiya infrastrukturunun idarə olunması, içməli suyun hazırlanması və paylanması, tullantı sularının toplanması və təmizlənməsi, yağış sularının idarə olunması, ekoloji təhlükəsizlik, rəqəmsal monitorinq və ağıllı idarəetmə texnologiyaları ilə bağlı praktiki biliklər əldə edirlər.
Proqramın ilk mərhələsində tələbələrə İSKİ-nin fəaliyyəti, şəhər infrastrukturunun idarə edilməsində rolu və müasir su təsərrüfatı sistemləri barədə təqdimatlar keçirilib. İştirakçılar həmçinin peşə hazırlığı proqramına qoşularaq əmək təhlükəsizliyi və sağlam iş mühitinin təşkili ilə bağlı təlimlərdə iştirak ediblər. Təcrübə çərçivəsində tələbələr Ataköy Yüksək Bioloji Tullantı Sularının Təmizlənməsi Qurğusu və İkitelli İçməli Suyun Təmizlənməsi Qurğusu kimi mühüm infrastruktur obyektlərinə səfər edərək müasir təmizləmə texnologiyaları və idarəetmə mexanizmləri ilə yaxından tanış olurlar.
Bununla yanaşı, iştirakçılar İstanbul Su və Nəzarət Avtomatlaşdırma Mərkəzində su və kanalizasiya şəbəkələrinin real vaxt rejimində monitorinqi və rəqəmsal idarəetmə sistemlərinin tətbiqi proseslərini öyrənirlər. Onlar üçün təşkil olunan “Sudan səmərəli istifadə və su mədəniyyəti” seminarında isə su ehtiyatlarının səmərəli idarə olunması, su itkilərinin azaldılması və dayanıqlı istehlak prinsipləri barədə məlumat verilir.
Proqram çərçivəsində tələbələr İstanbulun tarixi və mədəni irsi ilə də tanış olurlar. Miniatürk və Panorama 1453 Tarix Muzeyi, Terkos Su Sivilizasiyaları Muzeyi, Kirazlı Bəndi və Əyri Kəmər tarixi su kəmərinə təşkil olunan ekskursiyalar iştirakçılara şəhərin su idarəçiliyi ənənələrini və mühəndislik irsini öyrənmək imkanı yaradır.
Tələbə qrupuna rəhbərlik edən AzMİU-nun Beynəlxalq ortaq təhsil proqramlarının idarə edilməsi sektorunun müdiri Könül Şirinova və Su təsərrüfatı və mühəndis kommunikasiya sistemləri fakültəsinin dekan müavini Hamlet Əliyev tərəfindən İSKİ-nin Təhsil Şöbəsinin, Xarici Əlaqələr Şöbəsinin rəhbərləri və İnsan resursları və təlim departamentinin nümayəndələri ilə görüşlər keçirilib.
Görüşlərdə AzMİU ilə İSKİ arasında əməkdaşlığın genişləndirilməsi, tələbə və əməkdaş mübadiləsinin inkişaf etdirilməsi, birgə təlim və təcrübə proqramlarının təşkili, eləcə də su təsərrüfatı və şəhər infrastrukturu sahəsində yeni əməkdaşlıq imkanları müzakirə olunub.
Qeyd olunub ki, proqram iyulun 25-dək davam edəcək və sonda iştirakçılara sertifikatlar təqdim ediləcək.
