Kibertəhlükəsizlik artıq yalnız texniki peşə deyil, müasir cəmiyyətin təməlini qorumağa xidmət edən strateji missiyadır.
“Tehsil365” xəbər verir ki, bu fikri İsrailin Technion – Texnologiya İnstitutunun Davamlı Təhsil Mərkəzinin rəhbəri Moti Yeger Azərbaycan Kibertəhlükəsizlik Mərkəzinin (AKM) 7-ci məzun günündəki çıxışı zamanı səsləndirib.
O bildirib ki, bir əsrdən artıq tarixə malik Technion İnstitutu texnologiyanın insanların həyatını yaxşılaşdıracağına, cəmiyyətlərin inkişafına töhfə verəcəyinə və daha təhlükəsiz gələcəyin formalaşmasına xidmət edəcəyinə inanır. Bununla yanaşı, innovasiyanın yalnız məsuliyyət prinsipi ilə müşayiət olunduğu halda real dəyər qazandığını vurğulayıb.
Moti Yegerin sözlərinə görə, hazırda bu məsuliyyət daha da artıb. O qeyd edib ki, kritik infrastruktur, strateji aktivlər və insanların gündəlik istifadə etdiyi çoxsaylı xidmətlər etibarlı rəqəmsal sistemlərdən asılıdır. Texnologiyanın sürətli inkişafı ilə paralel olaraq kibertəhdidlərin də artdığını diqqətə çatdıran institut nümayəndəsi bildirib ki, kibertəhlükəsizlik müasir dövrdə cəmiyyətin dayanıqlığını təmin edən əsas istiqamətlərdən biridir.
O, həmçinin qeyd edib ki, bu ilin əvvəlində Technion beynəlxalq CS Rankings indeksində süni intellekt sahəsi üzrə Avropada birinci, kompüter elmləri istiqaməti üzrə isə dünyanın aparıcı ali təhsil müəssisələri sırasında yer alıb.
Moti Yeger vurğulayıb ki, bu nailiyyət yalnız elmi uğurları deyil, həm də bir əsrdən artıq müddətdə innovasiya ilə məsuliyyəti birləşdirən təhsil modelinin nəticəsini əks etdirir: “Müasir kibertəhlükəsizlik mütəxəssisi təkcə yüksək texniki biliklərə deyil, həm də analitik düşüncə tərzinə, yaranan riskləri əvvəlcədən qiymətləndirmək, kritik infrastrukturu və strateji aktivləri qorumaq, texnologiyadan etik və məsuliyyətli şəkildə istifadə etmək bacarıqlarına malik olmalıdır”.