Azərbaycan Kibertəhlükəsizlik Mərkəzi (AKM), İsrailin Technion – Texnologiya İnstitutu və İnnovasiya və Rəqəmsal İnkişaf Agentliyi (İRİA) arasında əməkdaşlıq iki ölkə arasında qurulan güclü tərəfdaşlığın bariz nümunəsidir.
“Tehsil365” xəbər verir ki, bunu İsrailin Technion İnstitutunun Davamlı Təhsil Mərkəzinin rəhbəri Moti Yeger Azərbaycan Kibertəhlükəsizlik Mərkəzinin 7-ci məzun günündəki çıxışı zamanı deyib.
O bildirib ki, tərəfdaşlıq çərçivəsində yalnız peşəkar bilik və təcrübə mübadiləsi aparılmır, eyni zamanda, uzunmüddətli imkanlar və etibarlı beynəlxalq əməkdaşlıq əlaqələri formalaşdırılır: “Biz birlikdə təkcə peşəkar təcrübə deyil, həm də uzunmüddətli imkanlar və etibarlı beynəlxalq əməkdaşlıq qururuq. Davamlı etimadlarına və öhdəliklərinə görə tərəfdaşlarımıza təşəkkür etmək istəyirəm”.
Moti Yeger məzunları əldə etdikləri bilik və bacarıqlardan məsuliyyətlə istifadə etməyə çağırıb: “Bu gün aldığınız sertifikat əldə etdiyiniz nailiyyətlərin təsdiqidir. Biliklərinizdən necə istifadə edəcəyiniz sizin peşəkar nüfuzunuzu müəyyən edəcək. Vacib olanı qoruyun, dürüstlüklə rəhbərlik edin və unutmayın ki, bilik tərəqqi yaradır, məsuliyyət isə onu qoruyur”.
Onun sözlərinə görə, kibertəhlükəsizlik sahəsində yüksəkixtisaslı mütəxəssislərin hazırlanması rəqəmsal dünyanın çağırışlarına cavab vermək və təhlükəsiz gələcək qurmaq baxımından mühüm əhəmiyyət daşıyır.