“Süni intellekt qısa müddətdə böyük həcmdə məlumatı emal edə, müxtəlif üslubları təqlid edə və məntiqi baxımdan düzgün mətnlər yarada bilir. Bununla belə, mən hesab edirəm ki, gələcəkdə süni intellekt yazıçını tam mənada əvəz edə bilməyəcək”.
Bu sözləri “Tehsil365”ə açıqlamasında yazıçı İradə Aytel bildirib.
Yazıçının sözlərin görə, bunun əsas səbəbi yazıçının yaratdığı əsərin yalnız sözlərin ardıcıl düzülüşündən ibarət olmamasıdır.
“Bu fikrin əsas səbəbi ondan ibarətdir ki, yazıçının yaratdığı əsər yalnız sözlərin ardıcıl düzülüşündən ibarət deyil. Ədəbiyyat insanın yaşadığı həyatın, hisslərinin, müşahidələrinin və daxili dünyasının ifadəsidir. Məhz buna görə də Süni intellekt alqoritmdir - hesablamağı, uyğunlaşdırmağı, oxşatmağı, təqlidi və s. bacarır, lakin hissləri, yaşantıları, ağrını... nə yaşaya, nə də yaşada bilməz. Süni intellekt mövcud məlumatlardan istifadə edərək yeni mətn qura bilər, lakin o, insan kimi sevə, ayrılıq hissini yaşaya, qorxa, ümid edə və ya həyat təcrübəsi qazana bilməz. Onun yazdığı mətnlər oxunaqlı və təsirli görünsə də, onların arxasında şəxsi tale və yaşanmış hisslər yoxdur”.
Onun sözlərinə görə, yazıçı hər əsərinə öz həyatından bir parça qatır.
“Yazıçı isə hər əsərinə öz həyatından bir parça qatır. Yazıçı cəmiyyətin problemlərini görür, insan psixologiyasını duyur, yaşadığı dövrün ruhunu əsərlərində əks etdirir. Oxucunu təsirləndirən də məhz bu səmimiyyət və həqiqilikdir. Böyük yazıçıların əsərləri bu gün də sevilirsə, bunun səbəbi yalnız gözəl dil, maraqlı sujet xətti deyil, həmin əsərlərdə əks olunan insan taleləri və dərin mənəvi dəyərlərdir. Süni intellekt bu xüsusiyyətləri təqlid edə bilər, lakin onları həqiqətən yaşaya bilməz”.
Yazıçı vurğulayıb ki, süni intellekti yazıçının rəqibi deyil, asistenti, köməkçisi kimi görmək daha məqsədəuyğundur.
“Bununla yanaşı, süni intellekti yazıçının rəqibi deyil, asistenti, köməkçisi kimi görmək daha məqsədəuyğundur. O, məlumat toplamaq, ideyaları sistemləşdirmək, ilkin mətn hazırlamaq və redaktə prosesində faydalı vasitə ola bilər. Lakin əsərə ruh verən, onu yaddaqalan edən yenə də insan təxəyyülü, duyğuları və fərdi baxışıdır.
Nəticə etibarilə, texnologiya nə qədər inkişaf etsə də, süni intellekt yazıçının yerini tam tuta bilməz”.