ADNSU tələbələrindən ibarət komandanın innovativ layihəsi kibertəhlükəsizlik üzrə I yerə layiq görülüb.
ADNSU-dan “Tehsil365” ə bildirilib ki, Azərbaycan Kibertəhlükəsizlik Mərkəzinin (AKM) VII kohortunun Məzun Günü keçirilib. Tədbirdə dövlət qurumlarının rəhbərləri, diplomatik korpusun nümayəndələri, ali təhsil müəssisələrinin rektorları, sənaye tərəfdaşları və digər rəsmi qonaqlar iştirak ediblər.
Bu il AKM-in VII kohortu üzrə 55 məzun təhsilini uğurla başa vurub. Onlardan 21 nəfəri Azərbaycan Dövlət Neft və Sənaye Universitetinin (ADNSU) tələbələridir ki, bu da universitetimizin kibertəhlükəsizlik sahəsində yetişdirdiyi yüksəkixtisaslı mütəxəssislərin hazırlığında mühüm rol oynadığını bir daha nümayiş etdirir.
Məzunlar arasında Red Team istiqaməti üzrə ən yüksək nəticəni də ADNSU tələbəsi Samir Abdullayev (BA proqramları) göstərərək 95 bal toplayıb və bu istiqamət üzrə kohortun lideri olub. Mərkəzin məzunları arasında ADNSU tələbələrinin daha bir uğuru isə komanda şəkilində birinci yeri tutması ilə bağlıdır. Belə ki, tədbir çərçivəsində komandalar tərəfindən hazırlanmış innovativ layihələrin təqdimatı da keçirilib. Doqquz komandanın iştirak etdiyi layihə müsabiqəsində ADNSU tələbələri Cavidan Aşurlu (SABAH qrupları), Nərgiz Heydərli (SABAH qrupları) və Məhəmmədəli Hüseynzadənin (İTİF) hazırladığı layihə I yerə layiq görülüb. Layihə innovativ yanaşması, praktik tətbiq imkanları və texnoloji üstünlükləri ilə münsiflər heyəti tərəfindən yüksək qiymətləndirilib.
Qürurverici məqamlardan biri də ondan ibarətdir ki, qalib layihə artıq Clomni və Devlink şirkətləri tərəfindən sınaqdan keçirilərək uğurla tətbiq olunub və hazırda aktiv istifadədədir. Bu, tələbələrin hazırladığı innovativ həllərin yalnız akademik mühit üçün deyil, həm də sənaye üçün real dəyər yaratdığını nümayiş etdirir.
Bununla yanaşı, AKM-in VII kohortu üzrə yüksək akademik göstəricilərinə, peşəkar hazırlıq səviyyəsinə və təlim müddətində nümayiş etdirdikləri uğurlu nəticələrə görə seçilmiş 5 məzun xarici ölkədə 1 aylıq peşəkar iş təcrübəsi (internship) keçmək hüququ qazanıb. Sevindirici haldır ki, seçilmiş məzunlar arasında ADNSU-nun SABAH qruplarının iki tələbəsi – Nəzrin Cəfərli və Aysu Vəliyeva da yer alır. Bu nailiyyət ADNSU tələbələrinin beynəlxalq səviyyədə rəqabətqabiliyyətli bilik və bacarıqlara malik olduqlarını bir daha nümayiş etdirir.
AKM-in VII kohortunun məzunlarının əldə etdiyi nailiyyətlər ölkəmizdə kibertəhlükəsizlik sahəsində yüksəkixtisaslı kadr hazırlığının uğurla inkişaf etdiyini, ADNSU-nun isə bu istiqamətdə aparıcı ali təhsil müəssisələrindən biri kimi öz mövqeyini daha da möhkəmləndirdiyini bir daha təsdiq edir.