Elm və Təhsil Nazirliyinin Akkreditasiya Şurasının növbəti iclasında ali təhsil müəssisələrinin və təhsil proqramlarının akkreditasiyası ilə bağlı mühüm qərarlar qəbul edilib.
SDU-dan “Tehsil365” ə bildirilib ki, təhsildə Keyfiyyət Təminatı Agentliyinin (TKTA) müəyyən etdiyi qrafikə uyğun keçirilmiş xarici keyfiyyət qiymətləndirilməsinin nəticələrinə əsasən, Sumqayıt Dövlət Universiteti (SDU) növbəti 3 il müddətinə institusional akkreditasiya olunmuş ali təhsil müəssisəsi statusu qazanıb.
İnstitusional akkreditasiya ilə yanaşı, universitetin ayrı-ayrı təhsil proqramları da yüksək qiymətləndirilib. Akkreditasiya Şurasının qərarına əsasən, SDU-nun aşağıdakı ixtisas və ixtisaslaşmaları 2025–2026-cı tədris ilindən etibarən növbəti 5 (beş) il müddətinə tam akkreditasiya olunmuş hesab edilib: Bakalavriat təhsil səviyyəsi üzrə: 050112 – Məktəbəqədər təhsil ixtisası; Magistratura təhsil səviyyəsi üzrə: 060117 – Məktəbəqədər təlim və tərbiyə ixtisasının Məktəbəqədər təlim və tərbiyənin metodikası və metodologiyası ixtisaslaşması.
Akkreditasiya Şurasının qərarına uyğun olaraq, tövsiyə və göstərişlərin icrasını təmin etmək, təhsilin keyfiyyətinin davamlı təkmilləşdirilməsi və daxili keyfiyyət təminatı mexanizmlərinin daha da gücləndirilməsi məqsədilə universitet tərəfindən müvafiq fəaliyyət planı hazırlanacaq, Təhsildə Keyfiyyət Təminatı Agentliyi ilə razılaşdırıldıqdan sonra mərhələli şəkildə icra ediləcək.
Əldə olunan nəticələr Sumqayıt Dövlət Universitetində keyfiyyət təminatı sisteminin institusional əsaslar üzərində inkişaf etdirildiyini, təhsil proqramlarının dövlət təhsil standartlarına və müasir ali təhsil tələblərinə uyğunlaşdırılması istiqamətində həyata keçirilən ardıcıl islahatların səmərəli nəticələr verdiyini bir daha təsdiqləyir. Qazanılan akkreditasiya uğuru universitetdə rəqabətqabiliyyətli mütəxəssis hazırlığının, akademik mühitin davamlı təkmilləşdirilməsinin və keyfiyyət mədəniyyətinin formalaşdırılması istiqamətində görülən sistemli fəaliyyətin mühüm göstəricisidir.