Azərbaycan Dillər Universitetinin (ADU) Beynəlxalq münasibətlər və regionşünaslıq fakültəsinin Şərq ölkələri üzrə regionşünaslıq kafedrasının müəllimi Şəhla Xələfova 17–18 iyul tarixlərində Albaniyanın Tirana şəhərində onlayn formatda keçirilən IV Sosyal və Humanitar Elmlər Akademiyası Konqresində uğurla iştirak edib.
ADU-dan “Tehsil365” ə bildirilib ki, müxtəlif ölkələrdən alim və tədqiqatçıları bir araya gətirən beynəlxalq konqres sosial və humanitar elmlər sahəsində aktual problemlərin müzakirəsinə, elmi təcrübə mübadiləsinə və beynəlxalq əməkdaşlığın inkişafına həsr olunub.
Şəhla Xələfova konqres çərçivəsində "Sustainable Digital Economy and the Impact of Artificial Intelligence on Its Development" ("Dayanıqlı rəqəmsal iqtisadiyyat və süni intellektin onun inkişafına təsiri") mövzusunda elmi məruzə ilə çıxış edib.
Məruzədə süni intellekt texnologiyalarının dayanıqlı rəqəmsal iqtisadiyyatın formalaşmasında rolu, rəqəmsal transformasiya prosesləri, innovativ texnologiyaların iqtisadi inkişaf və dayanıqlılığa təsiri, eləcə də bu sahədə mövcud çağırışlar və perspektivlər elmi yanaşma əsasında təhlil olunub.
Təqdim olunan məruzə konqres iştirakçıları tərəfindən maraqla qarşılanıb, mövzu ətrafında geniş fikir mübadiləsi aparılıb və müəllifin elmi yanaşması yüksək qiymətləndirilib.
Qeyd edək ki, IV Sosyal və Humanitar Elmlər Akademiyası Konqresi 17–18 iyul tarixlərində onlayn formatda təşkil olunub. Tədbir çərçivəsində müxtəlif ölkələrdən olan alimlərin iştirakı ilə sosial və humanitar elmlərin müxtəlif istiqamətlərini əhatə edən elmi məruzələr təqdim edilib.