Azərbaycan Turizm və Menecment Universitetində (ATMU) “Hilton Garden Inn Baku” hotelinin nümayəndələri ilə işgüzar görüş keçirilib. Görüşdə ATMU tərəfindən Turizm və qonaqpərvərlik fakültəsinin dekanı t.ü.f.d., dos. Bahadur Bilalov, Mehmanxana və restoran işi kafedrasının müdiri s.ü.f.d., dos. Tərlan Növrəsli, fakültənin tyutoru Nizami Hüseynov, “Hilton Garden Inn Baku” hotelini isə İnsan resursları üzrə menecer Şəhriyar Məmmədli və Qəbul və qeydiyyat üzrə menecer İlkin Şərifzadə təmsil ediblər.
ATMU-dan “Tehsil365” ə bildirilib ki, görüş zamanı universitet ilə qonaqpərvərlik sənayesi arasında əməkdaşlığın genişləndirilməsi, təhsil ilə real sektor arasında əlaqələrin gücləndirilməsi, eləcə də yüksəkixtisaslı kadr hazırlığı istiqamətində fikir mübadiləsi aparılıb.
Müzakirələr zamanı Turizm və qonaqpərvərlik fakültəsinin dekanı Bahadur Bilalov universitet-sənaye əməkdaşlığının daha da inkişaf etdirilməsinin, tələbələrin istehsalat və elmi-tədqiqat təcrübələrinin genişləndirilməsinin, həmçinin qonaqpərvərlik sektorunun nümayəndələrinin tədris prosesinə daha fəal cəlb edilməsinin əhəmiyyətini vurğulayıb.
Mehmanxana və restoran işi kafedrasının müdiri Tərlan Növrəsli hotel nümayəndələrinin iştirakı ilə qonaq mühazirələrinin təşkili, sənaye işçilərinin ixtisaslarının artırılması məqsədilə ATMU professor-müəllim heyəti tərəfindən ustad dərslərinin və seminarların keçirilməsi, həmçinin birgə layihələrin həyata keçirilməsi ilə bağlı fikirlərini səsləndirib.
Fakültənin tyutoru Nizami Hüseynov isə tərəfindən məzunlarla əlaqələrin inkişaf etdirilməsinin vacibliyini vurğulayaraq, onların universitetə verə biləcəyi töhfələrin əhəmiyyətini qeyd edib.
Görüşdə tərəflər tələbələrin peşəkar inkişafına dəstək verəcək birgə təşəbbüslərin həyata keçirilməsi, təcrübə imkanlarının genişləndirilməsi və universitet-sənaye əməkdaşlığının davamlı inkişafı istiqamətində əməkdaşlığın davam etdirilməsi barədə razılığa gəliblər.
Qarşılıqlı anlaşma və konstruktiv fikir mübadiləsi şəraitində keçən görüş gələcək əməkdaşlığın inkişafı baxımından səmərəli qiymətləndirilib.