Mingəçevir Dövlət Universiteti Təhsildə Keyfiyyət Təminatı Agentliyi tərəfindən həyata keçirilən institusional akkreditasiya qiymətləndirilməsinin nəticələrinə əsasən 5 il müddətinə institusional akkreditasiyadan uğurla keçib.
MDU-dan “Tehsil365” ə bildirilib ki, qiymətləndirmə çərçivəsində universitetdə təhsilin təşkili və keyfiyyət təminatı, strateji idarəetmə, tədris proqramlarının icrası, tələbəyönümlü təhsil mühitinin formalaşdırılması, elmi-tədqiqat fəaliyyəti, beynəlxalq əməkdaşlıq, insan resurslarının inkişafı və institusional idarəetmə mexanizmləri nəzərdən keçirilib.
Əldə olunan nəticə MDU-da təhsilin keyfiyyətinin yüksəldilməsi, idarəetmə proseslərinin təkmilləşdirilməsi, akademik fəaliyyətin müasir çağırışlara uyğunlaşdırılması və tələbələrin inkişafını dəstəkləyən mühitin yaradılması istiqamətində həyata keçirilən sistemli işlərin göstəricisidir.
İnstitusional akkreditasiyanın 5 il müddətinə verilməsi universitetin mövcud fəaliyyətinin müsbət qiymətləndirilməsi ilə yanaşı, qarşıdakı dövr üçün müəyyən edilmiş inkişaf hədəflərinin reallaşdırılmasına da əlavə stimul yaradacaq.
Mingəçevir Dövlət Universitetinin rəhbərliyi bu mühüm nəticənin əldə olunmasına töhfə verən professor-müəllim heyətinə, əməkdaşlara, tələbələrə, məzunlara və tərəfdaşlara təşəkkürünü bildirir.
MDU bundan sonra da təhsilin keyfiyyətinin davamlı yüksəldilməsi, elmi-tədqiqat imkanlarının genişləndirilməsi, beynəlxalq əməkdaşlığın gücləndirilməsi və rəqabətqabiliyyətli məzunların hazırlanması istiqamətində fəaliyyətini ardıcıl şəkildə davam etdirəcək.