Cəlilabad rayonunda Gənclər və İdman Nazirliyinin yaradılmasının 32-ci ildönümünə həsr olunan “III Regional Gənclər Festivalı” keçirilib.
“Tehsil365” AZERTAC-a istinadən xəbər verir ki, festival iştirakçıları əvvəlcə idmançıların nümunəvi çıxışlarını izləyib, daha sonra regionda fəaliyyət göstərən Gənclər Evləri Sosial Xidmət müəssisələrinin, eləcə də Cəlilabadda sənətkarlıq, əl işləri və xalq yaradıcılığı ilə məşğul olan gənclərin hazırladıqları sərgilərlə tanış olublar.
Tədbirdə çıxış edənlər Ümummilli Lider Heydər Əliyevin gənclər siyasətinin əsasını qoyduğunu, gənclərə daim xüsusi diqqət və qayğı göstərdiyini vurğulayıblar. Bildirilib ki, Azərbaycan gəncliyi Ulu Öndərin zəngin dövlətçilik irsini yüksək qiymətləndirir, onun müəyyən etdiyi inkişaf yoluna sadiqdir. Qeyd olunub ki, Prezident İlham Əliyevin ölkənin inkişafı, beynəlxalq nüfuzunun möhkəmləndirilməsi və ərazi bütövlüyünün təmin olunması istiqamətində həyata keçirdiyi siyasət gənclər tərəfindən dəstəklənir. Həmçinin “III Regional Gənclər Festivalı”nın Cəlilabadda təşkilinə verdiyi dəstəyə görə Cəlilabad Rayon İcra Hakimiyyətinə təşəkkür ifadə olunub.
Festival çərçivəsində panel müzakirələri, intellektual yarışlar, gənclərin bilik və bacarıqlarının artırılmasına yönəlmiş müxtəlif mövzularda təlimlər də keçirilib.