İtaliya həkimləri tibb tarixində ilk dəfə olaraq eyni xəstədə bir gözdən digərinə torlu qişanın mərkəzi hissəsinin (makula) və gözün ön seqmentinin autotransplantasiyasını uğurla həyata keçiriblər.
“Tehsil365” İtaliyanın Adnkronos informasiya agentliyinə istinadla xəbər verir ki, əməliyyat nəticəsində avtomobil qəzasından sonra beş ildən çox tam kor olan 67 yaşlı qadının görmə qabiliyyəti bərpa olunmağa başlayıb.
Məlumata görə, həkimlər görmə siniri zədələndiyi üçün funksiyasını itirmiş, lakin toxumaları sağlam qalan sol gözdən buynuz qişa, sklera, konyunktiva və ilk dəfə olaraq makulanı çıxararaq sağ gözə köçürüblər.
Qeyd olunur ki, bu nailiyyət oftalmologiya sahəsində mühüm dönüş nöqtəsi hesab edilir və gələcəkdə ağır göz travmaları alan xəstələrin müalicəsində yeni imkanlar yarada bilər.