Azərbaycan Dövlət Pedaqoji Universitetinin (ADPU) Elmi Şurasının növbəti iclası keçirilib. ADPU-nun rektoru professor Cəfər Cəfərov ötən dövrdə universitetin əməkdaş və tələbələrinin qazandığı uğurlar barədə məlumat verib, elmi ad və dərəcələr alan əməkdaşlara müvafiq sənədləri təqdim edib.
ADPU-dan “Tehsil365” ə bildirilib ki,Fizika fakültəsinin dekanı dosent Arzu Daşdəmirov və Ümumi tarix və tarixin tədrisi texnologiyası kafedrasının dosenti Pərviz Səfərova elmlər doktoru diplomları təqdim edilib. Pedaqogika üzrə fəlsəfə doktoru Fəridə Xudiyeva, tarix üzrə fəlsəfə doktoru Səbinə Həziyeva, filologiya üzrə fəlsəfə doktoru Mahirə Abdullayeva, fəlsəfə üzrə fəlsəfə doktoru Şasəddin Mikayılov (Şamaxı filialı), tarix üzrə fəlsəfə doktoru Taleh Cəfərov və tarix üzrə fəlsəfə doktoru Paşa Quluzadəyə dosent attestatı, pedaqogika üzrə fəlsəfə doktoru Gülşən Musayeva, fizika üzrə fəlsəfə doktoru Natella Namazova, siyasi elmlər üzrə fəlsəfə doktoru Qoşqar Bəylərov, pedaqogika üzrə fəlsəfə doktoru Məcid Bayramlı, sosial elmlər üzrə fəlsəfə doktoru Firuz Süleymanov, pedaqogika üzrə fəlsəfə doktoru Nərgiz Ağayeva, pedaqogika üzrə fəlsəfə doktoru Aysel Zeynallı və pedaqogika üzrə fəlsəfə doktoru Mehriban Sərdarovaya isə fəlsəfə doktoru diplomları təqdim edilib.
Elmi katib r.ü.f.d. Nərminə Abdullayeva ötən Elmi şuradan cari dövrədək universitet və onun filiallarında təşkil edilən layihə və tədbirlər barədə xülasəni təqdim edib.
Tədris işləri üzrə prorektor dosent Eldar Aslanov ADPU-da 2025/2026-cı tədris ilinin yaz semestrinin imtahan sessiyasının nəticələri barədə məruzə ilə çıxış edib. Qeyd edilib ki, sessiya ərzində təşkil edilən 2240 imtahanda 10 min 375 bakalavr, 581 nəfər magistrant olmaqla, 10 min 926 nəfər təhsilalan iştirak edib. Proses ərzində yaradılmış İmtahan Qərargahına 143 müraciət daxil olub ki, onlardan 52-si təsdiqini tapmayıb, 69 hal üzrə isə müraciətçinin lehinə qərar verilib. İmtahan nəticələrinə yenidən baxılması üçün Apellyasiya Komissiyasına 2096 ərizə daxil olub. Müraciətlərin 25 faizi tələbələrin xeyrinə həll edilib. Müraciət edənlərdən 48 faizinin cari imtahan nəticəsi qüvvədə saxlanılıb, müraciətlərin 27 faizi isə qəbul edilməyib.
E.Aslanov, həmçinin universitet və fakültələr üzrə müvəffəqiyyət və keyfiyyət göstəricilərinin təhlilini şura iştirakçılarına təqdim edib. Qeyd edilib ki, bakalavriat səviyyəsi üzrə orta müvəffəqiyyət göstəricisi 79 faizə, keyfiyyət göstəricisi isə 46 faizə bərabər olub. Magistratura səviyyəsi üzrə isə bu rəqəmlər müvafiq olaraq 98,4 faiz və 64 faizə bərabərdir.
Sonuncu tədris ili tələbələrinin təcrübələrinin yekunları barədə məlumat verən prorektor vurğulayıb ki, bakalavriat səviyyəsi üzrə hesabat təqdimatına buraxılan 2271 tələbənin hamısı müvəffəq qiymət alaraq təhsilini başa vurub. Yekun dövlət attestasiyasına buraxılan 17 tələbədən 11-i attestasiyadan uğurla keçib. Daha sonra ADPU-nun filiallarında keçirilən imtahan sessiyasının nəticələri dəyərləndirilib.
Elm və innovasiyalar üzrə prorektor professor Asəf Zamanov magistrantların dissertasiya işlərinin müdafiəsinin yekunları ilə bağlı hesabatla çıxış edib. A.Zamanov qeyd edib ki, II tədris ili magistrantlarının dissertasiya işlərinin müdafiəsi 19 iyun – 09 iyul tarixləri aralığında təşkil edilib. Vurğulanıb ki, cari tədris ilində ADPU-nun magistratura səviyyəsinin II tədris ilində təhsil alan 465 nəfərdən 448 nəfəri uğurla məzun olub. Ümumilikdə 378 magistrant dissertasiya müdafiəsində iştirak edib ki, onların 377 nəfərinin elmi işləri müdafiədən uğurla keçib. Prorektor yaz semestrinin imtahan sessiyasının nəticələrindən söz açaraq diqqətə açtdırıb ki, imtahanlarda ümumilikdə 581 nəfər magistrant iştirak edib, onların 571 nəfəri bütün imtahanlardan müvəffəq qiymət almağı bacarıb. Sonda A.Zamanov dissertasiya işlərinin hazırlanması və müdafiəsi ilə bağlı qeyd və təklifləri səsləndirib.
Daha sonra iclas cari məsələlərin müzakirəsi ilə davam edib.
Sonda müzakirə edilən məsələlər səsə qoyularaq qəbul edilib.