“Gənclər arasında kitab oxuma vərdişlərinin zəifləməsində sosial şəbəkələrin də rolu var.”
Bu fikirləri “Tehsil365”ə açıqlamasında yazıçı Elxan Elatlı bildirib.
“Gənclərin kitab oxuma vərdişlərinin zəifləməsinə əsas səbəblərdən biri orta məktəblərdə bədii ədəbiyyatın lazımınca təbliğ olunmamasıdırsa, bir vacib səbəb də sosial şəbəkələrə aludəçilikdir. Kitab oxumaq az da olsa zəhmət və diqqət tələb edir, sosial şəbəkələri izləmək isə heç nə tələb etmir və nəticədə gənclərimizdə beyin tənbəlliyi yaranır.”
Yazıçı bildirib ki, məktəb və universitetlərdə mütaliə vərdişinin formalaşdırılması üçün davamlı tədbirlər həyata keçirilməlidir.
“Məktəb və universitetlərdə mütaliə vərdişi yaratmaq və inkişaf etdirmək üçün birbaşa nazirliyin göstərişi və nəzarəti ilə davamlı tədbirlər həyata keçirilməlidir. Belə tədbirlərə kitab müzakirələri, kitab sərgiləri, yazarlarla görüşlər, müxtəlif bədii dərnəklərin yaradılmasını misal göstərmək olar.”
O, hesab edir ki, orta məktəblərdə şagirdlərin mütaliə vərdişlərinin formalaşdırılmasına dərs planı çərçivəsində yanaşmaq lazımdır.
“Eyni zamanda, orta məktəblərdə şagirdlərin mütaliə vərdişlərinin formalaşması işinə məcburi formada, yəni dərs planı çərçivəsində yanaşmaq lazımdır. Məncə bir vaxtlar təhsilimizdə mövcud olmuş və həftədə bir gün üçün nəzərdə tutulan "Sinifdənxaric oxu günü"nün yenidən tətbiq olunması yerinə düşər.”
Yazıçı qeyd edib ki, orta məktəblərin qarşısında duran əsas vəzifələrdən biri mənəvi cəhətdən yetkin gənclərin hazırlanmasıdır və bu istiqamətdə oxu vərdişlərinin yaradılması mühüm əhəmiyyət daşıyır.
“Nəzərə almaq lazımdır ki, bu gün orta məktəblərin qarşısında duran əsas vəzifə mənəvi cəhətdən yetkin gənclərin hazırlanmasıdırsa, bu çətin işdə uğur qazanmağın vacib şərtlərindən biri şagirdlərdə oxu vərdişlərinin yaradılmasıdır və bu məsələyə laqeyd yanaşmaq olmaz.”