İyulun 28-də Azərbaycan-Fransız Universitetinə (UFAZ) 2026-2027-ci tədris ili üçün bakalavriat pilləsi üzrə qəbul imtahanı keçirilib.
“Tehsil365” xəbər verir ki, UFAZ-a qəbul imtahanında iştirak etmək üçün Dövlət İmtahan Mərkəzinin (DİM) qəbul imtahanında I ixtisas qrupu üzrə 450 və daha artıq bal toplayan ümumilikdə 914 abituriyent qeydiyyatdan keçib. Onlardan 881-i imtahanda iştirak hüququ qazanıb, 712-si isə imtahanda iştirak edib.
İştirakçıların 546-sı Azərbaycan, 166-sı isə rus bölməsi üzrə imtahan verib. Onların 423-nü oğlan, 289-nu isə qız abituriyentlər təşkil edib.
İmtahan üçün UFAZ binasında 15-i Azərbaycan bölməsi, 5-i rus bölməsi, 1-i isə qarışıq olmaqda ümumilikdə 21 otaq ayrılıb. Prosesə 55 nəzarətçi və UFAZ əməkdaşları cəlb olunublar. Eyni zamanda, imtahan binasında tibbi personalın və polis xidmətinin fəaliyyəti təmin edilib.
Saat 10:00-da başlayıb 150 dəqiqə davam edən imtahanda abituriyentlər riyaziyyat, fizika, kimya, ümumi fənn bloku və ingilis dili fənləri üzrə biliklərini sınayıblar. İmtahan orta məktəb tədris dillərinə uyğun olaraq Azərbaycan və rus dillərində təşkil edilib.
Azərbaycan Dövlət Neft və Sənaye Universitetinin (ADNSU) ümumi işlər üzrə prorektoru Elnur İsmayılov, Strasburq Universitetinin (Unistra) professoru, UFAZ-ın proqram meneceri Yanik Hoaro və digər nümayəndələr imtahan prosesini müşahidə edib, abituriyentlər üçün yaradılmış şəraitlə tanış olublar.
İmtahan nəticələri iyulun 30-da dərc ediləcək, iyulun 31-də isə abituriyentlərin apellyasiya müraciətlərinə baxılacaq. Yüksək nəticə göstərərək şərti qəbul alan və UFAZ-da təhsil alacağını təsdiqləyən şəxslərin qeydiyyatı 31 iyul və 3-6 avqust tarixlərində UFAZ binasında aparılacaq.
Qeyd edək ki, imtahan nəticələrindən asılı olaraq ümumilikdə 190 nəfər dövlət sifarişli əsaslarla UFAZ-a qəbul olunacaq. Bakalavriat pilləsində "Kompüter elmləri" ixtisası üzrə 60, "Kimya mühəndisliyi" üzrə 40, "Kimya" üzrə 30, "Neft və qaz mühəndisliyi" üzrə 30 və "Geologiya və geofizika mühəndisliyi" üzrə 30 yer ayrılıb.