“İlk növbədə, onu qeyd edim ki, subbakalavr dərəcəsinin verilməsi yüksək texniki ixtisaslarda, gələcəkdə ali təhsil müəssisələrinə qəbul olmaq istiqamətində belə bir imkanın verilməsi peşə təhsilinə marağı da artırır”.
Bu sözləri “Tehsil365”ə açıqlamasında təhsil eksperti Elçin Əfəndi bildirib.
Ekspert bildirib ki, peşə təhsilinə marağın artırılması üçün atılan addımlardan biri də dual təhsil modelidir.
“İkinci bir tərəfdən, peşə təhsilinə marağın artırılması üçün dual təhsil modeli tətbiq olunub. Bu modellə tələbə həm təhsil almaq, həm də işləmək imkanı qazanır. Onun təcrübə keçmək imkanının tanınması da peşə təhsilinə marağın artırılmasına müsbət mənada təsir göstərir”.
Onun sözlərinə görə, peşə təhsil müəssisələri istehsal müəssisələri ilə əməkdaşlıq etməlidir.
“Əlavə olaraq düşünürəm ki, bu təklif etdiyim modeldir. Peşə təhsil müəssisələri müvafiq olaraq bəzi istehsalat müəssisələri ilə əməkdaşlıq etməlidirlər. Onlar bəzi təhsil müəssisələrinin və eyni zamanda, istehsalat üzərindən əməkdaşlıq çərçivəsində tələbələrin həmin istehsalat müəssisələri tərəfindən təcrübə keçmək imkanlarını qeyd etməlidirlər.
Ekspert vurğulayıb ki, tələbələrə müvafiq ödənişlər də edilməlidir.
“Onlara əmək fəaliyyəti ilə bağlı müvafiq ödənişlər ödənilməlidir. Eyni zamanda, peşə təhsili müəssisələri həmin tələbələrin hansı istehsalat müəssisələrində təcrübə keçdiklərini mütləq qeyd etməlidirlər. Son olaraq, maarifləndirici təbliğat xarakterli informasiyaların verilməsi peşə təhsilinə marağın daha da artırılmasına təkan vermiş ola bilər”.