İşğaldan azad olunmuş torpaqlarımızın mədəniyyət paytaxtı Şuşada IV Azərbaycan Beynəlxalq Elmi Tədqiqatlar Konfransı keçirilib.
“Tehsil365” xəbər verir ki, Konfransda ABŞ, İtaliya, Türkiyə, Səudiyyə Ərəbistanı, Polşa, Albaniya, Rusiya, Qazaxıstan və Azərbaycanın müxtəlif ali təhsil müəssisələri və elmi-tədqiqat institutlarını təmsil edən 300-ə yaxın alim, tədqiqatçı və doktorant əyani və onlayn formatda iştirak edib.
Odlar Yurdu Universitetinin "İqtisadiyyat və iqtisadi münasibətlər" kafedrasının müəllimləri, iqtisad üzrə fəlsəfə doktorları Ayşən Vəlibəyli, Sevinc Məmmədova və Solmaz Məmmədova da beynəlxalq konfransın iştirakçıları sırasında yer alaraq elmi müzakirələrə qoşulublar. Onlar konfransda öz elmi məruzələri ilə çıxış edərək müasir iqtisadi inkişaf və rəqəmsal transformasiya istiqamətlərində aparılan tədqiqatlarını iştirakçılarla bölüşüblər.
Plenar iclaslarda Qarabağ iqtisadi rayonunda həyata keçirilən bərpa və yenidənqurma layihələri, yüksək texnologiyaların tətbiqi, "Ağıllı şəhər" və "Ağıllı kənd" konsepsiyalarının iqtisadi əhəmiyyəti, eləcə də regionun inkişaf prioritetləri barədə geniş təqdimatlar səsləndirilib. Konfrans çərçivəsində iştirakçılar Şuşa, Xankəndi və Laçın şəhərlərində aparılan genişmiqyaslı bərpa və quruculuq işləri, tarixi-mədəni irsin qorunması istiqamətində həyata keçirilən layihələrlə də yaxından tanış olublar.
Odlar Yurdu Universitetinin müəllimlərinin belə nüfuzlu beynəlxalq elmi tədbirlərdə iştirakı universitetin elmi fəaliyyətinin inkişafına, beynəlxalq akademik əməkdaşlığın genişlənməsinə və elmi mühitdə fəal təmsil olunmasına mühüm töhfə verir.