“Bir çox insan düşünür ki, motivasiya itibsə, deməli, artıq məqsədinə uyğun deyil”.
Bu fikirləri “Tehsil365” ə açıqlamasında psixoloq Orxan Şərifzadə deyib.
Psixoloq bildirib ki, halbuki bu, əksər hallarda belə deyil. Motivasiya hiss deyil, dəyişkən bir psixoloji vəziyyətdir. O, bəzən yüksəlir, bəzən isə azalır. Əsas məsələ motivasiyanın azalmasını uğursuzluq kimi yox, insan psixikasının təbii xüsusiyyəti kimi qəbul etməkdir.
“İlk günlərdə yeni məqsəd bizə maraqlı və həyəcanlı görünür. Beyin yeniliyi sevir və buna görə də yüksək enerji hiss edirik. Lakin zaman keçdikcə yenilik hissi azalır, gündəlik çətinliklər ortaya çıxır və motivasiya əvvəlki qədər güclü olmur”.
Onun sözlərinə görə, digər səbəb isə nəticəni çox tez gözləməyimizdir. İnsan əziyyət çəkdiyi işin qarşılığını qısa müddətdə görməyəndə beynində məyusluq yaranır. Bu isə "Bəlkə də bacarmayacağam" düşüncəsinə səbəb olur və motivasiya zəifləyir. Həddindən artıq yorğunluq, yuxusuzluq, stres, emosional gərginlik və davamlı müqayisə də motivasiyanı azaldan əsas amillərdəndir. Sosial şəbəkələrdə başqalarının uğurlarını izləmək insanın öz inkişafını kiçik görməsinə və daxili gücünü itirməsinə səbəb ola bilər.
“Unutmayın ki, uğurlu insanlar hər gün motivasiyalı olduqları üçün deyil, motivasiya olmasa belə, davam etməyi bacardıqları üçün uğur qazanırlar. Davamlılıq motivasiyadan daha güclü psixoloji bacarıqdır.
Psixoloq vurğulayıb ki, əgər uzun müddət heç nəyə həvəsiniz qalmırsa, hər şey mənasız görünürsə, gündəlik fəaliyyətlər belə sizi yorursa, bu artıq sadəcə motivasiya problemi deyil, depressiya və ya emosional tükənmişliyin əlaməti ola bilər. Belə hallarda psixoloq dəstəyi almaq vacibdir.
“Motivasiya gözlənilən bir hiss deyil, yaradılan bir vərdişdir. Kiçik addımlarla başladığınız hər gün, sizi böyük məqsədlərinizə bir addım da yaxınlaşdırır”-deyə Orxan Şərifzadə qeyd edib.