“Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı” çərçivəsində 2026-2027-ci tədris ili üzrə doktorantura səviyyəsinə qəbulun nəticələri açıqlanıb.
“Tehsil365” xəbər verir ki, nəticələrə əsasən, doktorantura səviyyəsi üzrə ümumilikdə 22 nəfər Dövlət Proqramının qalibi olub.
Qəbul olunanların ölkələr üzrə bölgüsündə Böyük Britaniya və Şimali İrlandiya Birləşmiş Krallığı ilk sırada qərarlaşıb. Belə ki, bu ölkənin nüfuzlu ali təhsil müəssisələrinə 18 nəfər qəbul olunub.
Bununla yanaşı, Amerika Birləşmiş Ştatlarına 1 nəfər, Finlandiya Respublikasına 1 nəfər, İspaniya Krallığına 1 nəfər və Almaniya Federativ Respublikasına 1 nəfər doktorantura təhsili almaq hüququ qazanıb.
Qeyd edək ki, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” Azərbaycanın gənc mütəxəssislərinin dünyanın aparıcı universitetlərində təhsil almasını dəstəkləmək və ölkənin yüksəkixtisaslı insan kapitalını gücləndirmək məqsədi daşıyır.