Azərbaycan Dövlət İqtisad Universitetinin (UNEC) Data elmləri ixtisası üzrə magistrantları üçün Cənubi Koreyanın Sejong Universiteti ilə ikili diplom proqramına qəbul elan edilib.
“Tehsil365" xəbər verir ki, proqram çərçivəsində UNEC-də “Verilənlərin təhlili” ixtisaslaşması üzrə təhsil alan magistrantlar beynəlxalq təhsil imkanından yararlana biləcəklər.
Proqrama müraciət etmək üçün namizədlər UNEC-də qeyd olunan ixtisaslaşma üzrə magistratura tələbəsi olmalı, ingilis dili biliyinin minimum B2 səviyyəsində olduğunu təsdiqləməli, motivasiya məktubu, CV və akademik arayış təqdim etməlidirlər.
Namizədlərin akademik göstəriciləri, ixtisas uyğunluğu və dil hazırlığı qiymətləndiriləcək.
IELTS imtahanından 5.5 və daha yüksək nəticə təqdim edən tələbələr üçün 30 faiz təhsil təqaüdü imkanı nəzərdə tutulur. Həmçinin tələbələr üçün Cənubi Koreyada yataqxana ödənişindən azadolma imkanı da mövcuddur.
Təhsil modeli üzrə ilk tədris ili UNEC-də, ikinci tədris ili isə Sejong Universitetində keçiriləcək. Proqramı uğurla başa vuran məzunlara Sejong Universiteti tərəfindən “Süni intellekt və Data elmi” ixtisası üzrə diplom təqdim olunacaq.
Ətraflı məlumat üçün (012) 492 18 82 nömrəsi ilə əlaqə saxlamaq mümkündür.