Bakı Mühəndislik Universitetinin (BMU) məzunu Fatimeyi Zəhra Seyfiyeva “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”nın qalibi olub. O, Böyük Britaniyanın Edinburq Universitetində bioanalitik kimya ixtisası üzrə doktorantura təhsili alacaq.
“Tehsil365" AZƏRTAC-a istinadən xəbər verir ki, Fatimeyi Zəhra Seyfiyeva BMU-da kimya sahəsi üzrə ingilis dilində təhsil alıb. Universiteti müvəffəqiyyətlə bitirən məzun dünyanın 7 nüfuzlu universitetinin magistr proqramlarına qəbul olub. O, Dövlət Proqramı çərçivəsində Edinburq Universitetində magistratura təhsili alıb.
Magistratura təhsili ilə yanaşı, Edinburq Universiteti nəzdində Regenerasiya və Bərpa İnstitutunda (Institute for Regeneration and Repair (IRR) üçaylıq tədqiqat proqramında iştirak edir. Burada Parkinson xəstəliyinin erkən diaqnostikası üçün nanoelektrod əsaslı biosensorların hazırlanması istiqamətində elmi-tədqiqat aparır. Əsas məqsədi doktorantura təhsili dövründə magistratura mərhələsində üzərində çalışdığı nanoelektrodların dizaynı və səth modifikasiyası istiqamətində apardığı tədqiqatları daha da inkişaf etdirməkdir.
BMU məzunu bildirib ki, məqsədi Parkinson xəstəliyinin erkən diaqnostikasında istifadə oluna biləcək nanoelektrod əsaslı biosensor platformalarının hazırlanması və onların canlı hüceyrələrdə tətbiqinin araşdırılmasıdır. “Tədqiqatlarımız uğurlu nəticələr verərsə, bu texnologiyanın digər xəstəliklərin, o cümlədən xərçənglə bağlı araşdırmalarda tətbiqini genişləndirməyi planlaşdırırıq. Eyni zamanda, elmi rəhbərimlə birlikdə gələcəkdə geyinilə bilən (wearable) biosensorların hazırlanması istiqamətində tədqiqat aparmağı nəzərdə tuturuq”, - deyə o qeyd edib.
Fatimeyi Zəhra Seyfiyeva doktoranturanı başa vurduqdan sonra xaricdə qazandığı bilik və təcrübəni Azərbaycana gətirərək bu sahənin inkişafına töhfə vermək istədiyini deyib: “Mənim bu sahəyə yönəlməyimdə və akademik inkişafımda Bakı Mühəndislik Universitetinin böyük rolu olub. Gələcəkdə universitetdə həm elmi-tədqiqat, həm də tədris fəaliyyətində iştirak etməyi, qazandığım bilik və təcrübəni bu sahəyə maraq göstərən gənclərlə bölüşməyi arzulayıram. Bununla yanaşı, universitetimizin müəllimləri və digər tədqiqatçılarla birlikdə layihələr həyata keçirməyi, yeni əməkdaşlıq əlaqələri qurmağı və ölkəmizdə biosensorlar sahəsinin inkişafına öz töhfəmi verməyi qarşıma məqsəd qoymuşam. Mənə göstərilən etimadı doğrultmaq, öyrəndiklərimi faydalı nəticələrə çevirmək və gələcəkdə Azərbaycan elminə dəyər qatmaq ən böyük hədəflərimdəndir”.