Bakı Mühəndislik Universiteti ilə Koreya Respublikasının İNHA Universiteti arasında həyata keçirilən beynəlxalq ikili diplom proqramı çərçivəsində 2026/2027-ci tədris ili üzrə qəbul prosesi davam edir.
“Tehsil365" xəbər verir ki, Prezident İlham Əliyevin “Azərbaycan Respublikasında ali təhsil sisteminin beynəlxalq rəqabətliliyinin artırılması ilə bağlı əlavə tədbirlər haqqında” Sərəncamına əsasən icra müddəti 2030-cu ilədək uzadılan proqram ölkədə beynəlxalq standartlara uyğun mühəndis kadrlarının hazırlanmasına mühüm töhfə verir. Tədris 3+1 modeli əsasında təşkil olunur: tələbələr üç il BMU-da, bir il isə Koreya Respublikasının nüfuzlu İNHA Universitetində təhsil alır və məzun olduqda hər iki ali təhsil müəssisəsinin bakalavr diplomuna yiyələnirlər. Təhsilalanların Koreyada birillik təhsil və digər müvafiq xərcləri Dövlət Proqramı çərçivəsində qarşılanır.
2026/2027-ci tədris ili üzrə proqrama qəbul Kompüter elmləri (Süni intellekt mühəndisliyi), Data analitikası (Data elmləri), İnformasiya texnologiyaları, və Elektrik və elektronika mühəndisliyi ixtisasları üzrə aparılır. Bu ixtisaslar müasir texnologiyaların inkişafında aparıcı rol oynayan, əmək bazarında yüksək tələbat olan və beynəlxalq karyera imkanları yaradan istiqamətləri əhatə edir.
Proqramın əsas üstünlükləri sırasında beynəlxalq təhsil mühiti, ingilis dilində tədris, dünyanın aparıcı universitetlərindən birində təhsil almaq imkanı, ikili diplom əldə edilməsi, eləcə də qlobal əmək bazarında yüksək rəqabət qabiliyyətinə malik mütəxəssis kimi formalaşmaq imkanları yer alır.
İkili diplom prqoramına qəbul Dövlət İmtahan Mərkəzinin bakalavriat səviyyəsi üzrə qəbul imtahanlarının nəticələri və İNHA Universiteti tərəfindən təşkil olunan daxili imtahan əsasında həyata keçirilir. Namizədlər riyaziyyat, fizika və ingilis dili fənləri üzrə keçiriləcək daxili imtahanda iştirak etməlidirlər.
Sənədlərin qəbulu 1 avqust 2026-cı il saat 23:55-dək davam edəcək. Daxili imtahan 4 avqust 2026-cı il tarixində keçiriləcək, nəticələr isə 6 avqust 2026-cı il tarixində elan olunacaq. Ətraflı- https://beu.edu.az/az/admission/dual-degree/beu-inha-dual-degree-program