Cəmiyyətdə piyada mədəniyyətinin formalaşdırılması, yol hərəkəti təhlükəsizliyinin təmin edilməsi və bu sahədə orta məktəblərin rolu daim aktual olan məsələlərdəndir. Məktəblərdə bu istiqamətdə ayrıca icbari fənnin keçirilməsi və ya mövcud proqramlara inteqrasiya olunması vaxtaşırı müzakirə edilir.
Mövzu ilə bağlı fikirlərini “Tehsil365” açıqlamasında yol hərəkəti üzrə ekspert Ərşad Hüseynov bildirib.
Ekspert vurğulayıb ki, uşaqlara və gənclərə yol hərəkəti təhlükəsizliyi qaydalarının, eləcə də piyada mədəniyyətinin kiçik yaşlardan aşılanması həyati əhəmiyyət daşıyır:
“Yol hərəkəti təhlükəsizliyi və piyada mədəniyyəti sadəcə qanunlar toplusu deyil, həm də bir yaşam mədəniyyətidir. Bu vərdişlərin formalaşmasında məktəblərin üzərinə böyük məsuliyyət düşür. Şagirdlərə yol qaydalarını, piyada keçidlərindən düzgün istifadəni və yolda təhlükəsiz davranışı öyrətmək vacibdir.”
Ərşad Hüseynovun sözlərinə görə, məktəblərdə bu mövzunun tədrisi yalnız nəzəriyyə ilə məhdudlaşmamalı, praktiki və maarifləndirici xarakter daşımalıdır:
“Ayrıca icbari fənnin tətbiqi və ya mövcud həyat bilgisi fənninin tərkibində bu mövzulara xüsusi yer ayrılması vacibdir. Əsas məsələ şagirdlərin sadəcə qaydaları əzbərləməsi deyil, yolda özlərinin və başqalarının təhlükəsizliyinə məsuliyyətlə yanaşmağı öyrənmələridir.”
Ekspert sonda diqqətə çatdırıb ki, məktəb yaşlarından qazanılan yol mədəniyyəti gələcəkdə həm piyadaların, həm də sürücülərin daha intizamlı olmasına və yol qəzalarının minimuma enməsinə birbaşa təsir göstərəcəkdir.