İkitərəfli əməkdaşlıq üzrə Birgə Komissiya əlaqələrimizin inkişafında xüsusi rol oynayır. Eyni zamanda, vizasız gediş-gəliş rejiminin tətbiqi, şübhəsiz ki, insanlar arasında təmasların genişlənməsinə, turizm və işgüzar əlaqələrin inkişafına mühüm töhfə verib. Sevindirici haldır ki, ötən il Mərakeşdən Azərbaycana gələn turistlərin sayında 28 faiz artım qeydə alınıb.
“Tehsil365” xəbər verir ki, bu sözləri Azərbaycanın mədəniyyət naziri Adil Kərimli Bakıda Mərakeşin milli bayramı münasibətilə təşkil olunan rəsmi qəbulda söyləyib.
O bildirib ki, ölkələrimiz arasında ticarət dövriyyəsi ötən dövrlə müqayisədə 5 faiz artıb: “Cari ildən etibarən müvafiq ikitərəfli sazişə uyğun olaraq, qarşılıqlı əsasda hər iki ölkədən olan tələbələrin akademik mübadiləsi həyata keçiriləcək. Bu müsbət dinamika ölkələrimiz arasında iqtisadi-ticarət və investisiya əlaqələrinin daha da genişləndirilməsi üçün əlverişli zəmin yaradır, mövcud potensialın səmərəli reallaşdırılmasına xidmət edir”.