Azərbaycan Dövlət Neft və Sənaye Universitetində (ADNSU) idarəetmənin səmərəliliyinin artırılması, akademik fəaliyyətin müasir tələblərə və əmək bazarının dəyişən ehtiyaclarına uyğun təşkili, eləcə də struktur bölmələri arasında koordinasiyanın gücləndirilməsi məqsədilə genişmiqyaslı struktur yenilənməsi həyata keçirilib.
“Tehsil365” xəbər verir ki, ADNSU Elmi Şurasının qərarına əsasən, universitetin təşkilati strukturu optimallaşdırılıb, fakültə və kafedraların fəaliyyət istiqamətləri yenidən formalaşdırılıb. Dəyişikliklər nəticəsində fakültələrin sayı 7-dən 6-ya, kafedraların sayı isə 24-dən 18-ə endirilib. Eyni zamanda Xarici dillər mərkəzi və AZİU Biznes Məktəbi yaradılıb.
Universitetin yenilənmiş strukturunda aşağıdakı fakültələr fəaliyyət göstərəcək:
• Rəqəmsal texnologiyalar fakültəsi
• Yer elmləri və neft mühəndisliyi fakültəsi
• Kimya texnologiyaları fakültəsi
• Sənaye mühəndisliyi fakültəsi
• Energetika fakültəsi
• Biznes və idarəetmə fakültəsi
Struktur dəyişiklikləri çərçivəsində yeni yaradılan Rəqəmsal texnologiyalar fakültəsinə dekan, 11 kafedraya müdir, Xarici dillər mərkəzinə isə direktor təyin olunub. Digər fakültə dekanları və kafedra müdirlərinin təyinatları struktur yenilənməsi ilə bağlı müəyyən edilmiş qaydalara uyğun olaraq əvvəlki rəhbər heyət arasından həyata keçirilib.
Yeni rəhbər heyət müxtəlif elm və təhsil sahələrində uzun illik pedaqoji, tədqiqat, beynəlxalq əməkdaşlıq, dövlət idarəçiliyi və texnologiya təcrübəsinə malik mütəxəssislərdən ibarətdir. Müvafiq rəhbər vəzifələrə təyin olunan şəxsləri təqdim edirik.
Almaniyanın Leypsiq Universitetində doktorantura təhsili alaraq Dr. rer. nat. elmi dərəcəsi qazanan Elşən Abdullayev Yer elmləri kafedrasının müdiri təyin edilib. Təxminən 20 illik peşəkar təcrübəyə malik Elşən Abdullayev UFAZ-da Yer elmləri proqramının koordinatoru, Xəzər Universitetində Neft-qaz mühəndisliyi departamentinin müdiri və yer elmləri üzrə mühazirəçi kimi çalışıb. O, Almaniyada DAAD, ABŞ-nin Georgia Universitetində isə Fulbright proqramları çərçivəsində elmi fəaliyyət göstərib.
Texnika üzrə fəlsəfə doktoru, dosent İnqlab Əliyev Neft-qaz mühəndisliyi kafedrasının müdiri təyin olunub. Bakalavr, magistratura və doktorantura təhsilini ADNSU-da başa vuran İnqlab Əliyev 2010-cu ildən universitetdə elmi-pedaqoji fəaliyyət göstərir. O, Qaz-neft-mədən fakültəsində elmi işlər və beynəlxalq münasibətlər üzrə dekan müavini, Neft-qaz mühəndisliyi kafedrasında dosent və son olaraq ADNSU-nun Elmi katibi vəzifələrində çalışıb.
Fizika üzrə fəlsəfə doktoru Xəyalə Əliquliyeva Elektromexanika kafedrasının müdiri təyin olunub. Bakı Dövlət Universitetində fizika və bioloji fizika üzrə təhsil alan, AMEA-nın Fizika İnstitutunda doktorantura keçən Xəyalə Əliquliyevanın 17 ilə yaxın elmi-pedaqoji təcrübəsi var. O, AMEA-da elmi işçi, Sumqayıt Dövlət Universitetində baş müəllim, dosent, elmi-tədqiqat laboratoriyasının müdiri və kafedra müdiri kimi çalışıb. 75-dən çox elmi əsərin və iki metodik vəsaitin müəllifi olan Xəyalə Əliquliyeva “Yüksəliş” müsabiqəsinin eksperti kimi də fəaliyyət göstərib.
Tarix üzrə fəlsəfə doktoru, dosent Nərminə Əmirbəyova Humanitar fənlər kafedrasının müdiri təyin olunub. Bakı Dövlət Universitetinin Tarix fakültəsinin məzunu olan Nərminə Əmirbəyovanın təxminən 29 illik əmək təcrübəsi var. O, orta məktəbdə tarix müəllimi, AMEA-nın Tarix və Etnologiya İnstitutunda aparıcı elmi işçi, 2018-ci ildən isə ADNSU-da dosent kimi çalışıb. Altı monoqrafiyanın və 40 elmi məqalənin müəllifidir, 25-dən çox beynəlxalq konfrans və konqresdə iştirak edib.
İqtisad üzrə fəlsəfə doktoru Xatirə Dövlətova İqtisadiyyat kafedrasının müdiri təyin olunub. UNEC-də bakalavr və MBA təhsili alan Xatirə Dövlətova 2016-cı ildən ADNSU-nun bakalavr və MBA proqramlarında iqtisadiyyat, marketinq, qərar elmi, istehlakçı davranışı və tədqiqat metodları üzrə fənlər tədris edib. O, Təhsil İnstitutunda aparıcı təhsil mütəxəssisi kimi kurikulumların hazırlanması, akkreditasiya və keyfiyyət təminatı proseslərində iştirak edib, “İnnovativ Məktəb” layihəsində koordinator kimi fəaliyyət göstərib.
Filologiya üzrə fəlsəfə doktoru Aynur Məmmədova Xarici dillər mərkəzinin direktoru təyin olunub. Azərbaycan Dillər Universitetinin İngilis dili fakültəsinin məzunu olan Aynur Məmmədovanın 37 ilə yaxın əmək təcrübəsi var. O, 1994-cü ildən ADNSU-nun Xarici dillər kafedrasında baş laborant, müəllim və baş müəllim vəzifələrində çalışaraq ingilis dilinin tədrisi və tələbələrin xarici dil bacarıqlarının inkişafı istiqamətində fəaliyyət göstərib. Elmi məqalələrin və tədris-metodik vəsaitlərin müəllifidir.
Həyata keçirilən struktur dəyişiklikləri və yeni rəhbər təyinatlarının ADNSU-da çevik və nəticəyönümlü idarəetmə modelinin formalaşdırılmasına, tədris proqramlarının müasir tələblərə uyğunlaşdırılmasına, elmi-tədqiqat fəaliyyətinin gücləndirilməsinə və universitetin strateji inkişaf hədəflərinin daha səmərəli şəkildə həyata keçirilməsinə mühüm töhfə verəcəyi gözlənilir.