Azərbaycan Milli Elmlər Akademiyasının (AMEA) prezidenti akademik İsa Həbibbəyli qədim Qəbələ şəhərinin Səlbir sahəsində fəaliyyət göstərən Azərbaycan-Koreya Beynəlxalq Qəbələ arxeoloji ekspedisiyasının apardığı qazıntı işləri ilə yaxından tanış olub.
“Tehsil365” xəbər verir ki, beynəlxalq ekspedisiyanın rəhbəri, tarix üzrə fəlsəfə doktoru Ceyhun Eminli və Koreya heyətinin üzvləri tədqiqatın gedişatı və əldə edilmiş nəticələr barədə məlumat veriblər.
Akademik İsa Həbibbəyli Qafqaz Albaniyası tarixində mühüm rolu olan Qəbələnin ərazisində arxeoloji tədqiqat işlərinin daha da genişləndirilməsinin əhəmiyyətini bildirib, bu məqsədlə davamlı dəstəyin göstərildiyini diqqətə çatdırıb. SEBA (Seul-Bakı) Azərbaycan-Koreya Mədəniyyət Mübadiləsi Assosiasiyası tərəfindən tədqiqatlara verilən dəstəyi xüsusi vurğulayan akademik İsa Həbibbəyli birgə tədqiqatların nəticələrini özündə əks etdirən elmi məqalələrin hazırlanmasına xüsusi diqqət yetirilməsinin vacibliyini qeyd edib.
Tədbir zamanı AMEA Arxeologiya və Antropologiya İnstitutunun direktoru Fərhad Quliyev, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının sədri Ruhəngiz Heydərova və beynəlxalq ekspedisiya üzvlərinin iştirakı ilə arxeoloji qazıntı işlərinin gedişatı barədə fikir mübadiləsi aparılıb, tədqiqatların perspektivləri müzakirə edilib. Müzakirə çərçivəsində təklif və mülahizələr bildirilib, müvafiq təkliflər səsləndirilib.
Sonra tədbir iştirakçıları Qədim Qəbələnin Səlbir ərazisində Azərbaycan və Koreya arxeoloqlarının birgə apardığı arxeoloji tədqiqatlara həsr edilmiş sərgi ilə tanış olublar. Sərgi ilə tanışlıq əsnasında akademik İsa Həbibbəyli Azərbaycan və Koreya arxeoloqlarının apardıqları birgə tədqiqatları iki dövlət arasında elmi əməkdaşlığın əhəmiyyətli nəticəsi kimi dəyərləndirib, bu əməkdaşlıq əlaqələrinin digər elm sahələri istiqamətində də genişləndiriləcəyinə əminliyini ifadə edib.