Yaponiyada doğum səviyyəsinin uzun illərdir aşağı olması təhsil sistemində ciddi dəyişikliklərə səbəb olur. Şagird sayının azalması fonunda ölkənin müxtəlif bölgələrində bəzi məktəblər bağlanır, digərləri isə daha səmərəli fəaliyyət göstərmək məqsədilə vahid kampuslarda birləşdirilir.
“Tehsil365” in xarici KİV-dən əldə etdiyi məlumata əsasən, xüsusilə kənd və ucqar ərazilərdə bu proses daha sürətlə gedir. Şagird çatışmazlığı səbəbindən siniflərin sayının azalması və məktəblərin boş qalması yerli idarəetmə orqanlarını yeni həll yolları axtarmağa vadar edir.
Yaponiya hökuməti hesab edir ki, məktəblərin birləşdirilməsi təhsil resurslarından daha səmərəli istifadə etməyə, müəllim çatışmazlığını azaltmağa və şagirdlərə daha geniş təhsil imkanları yaratmağa kömək edə bilər. Bununla yanaşı, bəzi valideynlər məktəblərin bağlanmasının uşaqların uzun məsafə qət etməsinə və yerli icmaların zəifləməsinə səbəb ola biləcəyindən narahatdırlar.
Ekspertlər bildirirlər ki, əhalinin qocalması və doğum səviyyəsinin aşağı qalması nəzərə alınarsa, məktəblərin optimallaşdırılması yaxın illərdə də Yaponiyanın təhsil siyasətinin əsas istiqamətlərindən biri olaraq qalacaq.