Qardabani Təhsil və İnteqrasiya Mərkəzində Azərbaycan Əlifbası və Azərbaycan Dili Gününə həsr olunmuş maarifləndirici tədbir keçirilib.
“Tehsil365” AZERTAC-a istinadən xəbər verir ki, tədbirdə mərkəzin şagirdləri, gənclər və müəllimlər iştirak ediblər.
Mərkəzinin direktoru Çiçək Hüseynova çıxışında Azərbaycan dilinin milli kimliyimizin, mədəniyyətimizin və mənəvi dəyərlərimizin əsas daşıyıcısı olduğunu vurğulayıb. Ana dilimizin qorunmasının, düzgün istifadəsinin və gələcək nəsillərə sevdirilməsinin vacibliyindən danışıb, bu cür tədbirlərin gənclərin milli dəyərlərə bağlılığının gücləndirilməsində mühüm rol oynadığını qeyd edib.
Daha sonra mərkəzin şagirdi Lalə Zeynalova “Azərbaycan dili və əlifbasının tarixi” mövzusunda təqdimatla çıxış edib. Azərbaycan əlifbasının keçdiyi inkişaf mərhələləri, müxtəlif dövrlərdə istifadə olunan əlifbalar, Azərbaycan dilinin formalaşması və inkişaf yolu haqqında ətraflı məlumat verib.
Mərkəzin Azərbaycan dili və ədəbiyyatı müəllimi Sevda Şahverdiyeva çıxış edərək Azərbaycan dilinin zənginliyi, saflığının qorunmasının vacibliyi və gənc nəslin bu istiqamətdə üzərinə düşən məsuliyyətdən danışəb, Ana dilinin yalnız ünsiyyət vasitəsi deyil, həm də xalqın tarixi yaddaşı və milli irsinin ayrılmaz hissəsi olduğunu vurğulayıb.
Sonra şagirdlər Azərbaycan dili, Vətən və milli dəyərlər mövzusunda şeirlər söyləyib, maarifləndirici təqdimatlarla çıxış ediblər.
Mövzu ətrafında fikir mübadiləsi aparılıb, Azərbaycan dilinin gündəlik həyatda düzgün istifadəsinin əhəmiyyəti vurğulanıb. Qeyd edilib ki, Azərbaycan dili xalqımızın milli sərvətidir və onun qorunması hər bir vətəndaşın mənəvi borcudur.