Əlilliyi olan bir qrup uşağın və gəncin valideynləri ilə birlikdə Qəbələ rayonuna ekskursiyası təşkil olunub. Qonaqlar Qəbələ Dövlət Tarix-Bədii Qoruğundan və Qəbələ Arxeoloji Mərkəzindən xoş təssüratlarla ayrılıblar.
“Tehsil365” xəbər verir ki, əlil uşaq və gənclər, eləcə də onları müşayət edən valideynləri əvvəlcə Qəbələ Arxeoloji Mərkəzinin sərgi salonları ilə tanış olublar. Qoruğun ekskursiyaçıları tərəfindən qonaqlara ərazidə aparılan arxeoloji qazıntılar zamanı aşkar edilmiş tarixi, maddi və mədəni irs nümunələri barədə ətraflı məlumat verilib. Qeyd edilib ki, Qəbələ Dövlət Tarix-Bədii Qoruğu ərazisində mütəmadi olaraq aparılan arxeoloji qazıntılar nəticəsində aşkarlanan maddi-mədəniyyət nümunələri Arxeoloji Mərkəzin laboratoriyasında elmi tədqiq və bərpa olunduqdan sonra sərgi salonlarında nümayiş etdirilir.
Ekskursiya zamanı valideynlər və uşaqlar qədim eksponatlarla böyük maraqla tanış olub, Azərbaycanın zəngin tarixi və mədəni irsi haqqında yeni biliklər əldə ediblər. Onlar qədim məişət əşyalarını, əmək alətlərini, saxsı qabları və digər qiymətli eksponatları maraqla izləyərək, bələdçilərin verdiyi məlumatları diqqətlə dinləyiblər. Bu tanışlıq uşaqların dünyagörüşünün genişlənməsinə, milli tariximizə və mədəni irsimizə maraqlarının daha da artmasına mühüm töhfə verib.
Daha sonra iştirakçılar Qəbələ Arxeoloji Mərkəzinin akt zalına dəvət olunublar. Qoruğun direktoru Zahir Kərimov mərkəzin yaranma tarixi, fəaliyyəti və əhəmiyyəti barədə geniş məlumat verib. Qeyd edilib ki, Qəbələ Arxeoloji Mərkəzi SEBA (Seul–Bakı) Azərbaycan–Koreya Mədəniyyət Mübadiləsi Assosiasiyasının təşəbbüsü, təşkilatçılığı və maliyyə dəstəyi ilə yaradılıb.
Daha sonra iştirakçılara "Qafqaz Albaniyasının paytaxtı – Qəbələ" sənədli filmi nümayiş etdirilib.
Qəbələ Dövlət Tarix-Bədii Qoruğu və Qəbələ Arxeoloji Mərkəzinə təşkil olunan bu səfər iştirakçılar üçün həm maarifləndirici, həm də yaddaqalan olub. Uşaqlar və valideynlər qədim tariximizlə yaxından tanış olmaqdan böyük məmnunluq duyduqlarını bildirib, səfərin onlarda unudulmaz təəssüratlar yaratdığını qeyd ediblər.