"Şəhidin səsi" proqramının növbəti buraxılışı Vətən müharibəsi şəhidi Şəbiyev Məhəmməd Vaqif oğlunun əziz xatirəsinə həsr olunacaq.
"Tehsil365" xəbər verir ki, Məhəmməd Şəbiyev 6 avqust 1998-ci ildə Bakı şəhərində anadan olub. O, 2013–2016-cı illərdə Cəmşid Naxçıvanski adına Hərbi Liseydə, 2016–2020-ci illərdə isə Heydər Əliyev adına Azərbaycan Ali Hərbi Məktəbində ali hərbi təhsil alıb. Təhsilini başa vurduqdan sonra Azərbaycan Silahlı Qüvvələrinin sıralarında leytenant hərbi rütbəsində tağım komandiri kimi xidmət edib.
2020-ci il sentyabrın 27-də başlayan Vətən müharibəsi zamanı Tərtər rayonunun Suqovuşan qəsəbəsinin azadlığı uğrunda gedən döyüşlərdə qəhrəmanlıqla vuruşan Məhəmməd Şəbiyev oktyabrın 4-də Suqovuşan istiqamətində gedən döyüşlərdə şəhidlik zirvəsinə ucalıb. O, Bakı şəhərində yerləşən II Şəhidlər Xiyabanında dəfn edilib.
Azərbaycan Prezidenti İlham Əliyevin müvafiq sərəncamları ilə Məhəmməd Şəbiyev ölümündən sonra "Vətən uğrunda", "Suqovuşanın azad edilməsi uğrunda" və "Cəsur döyüşçü" medalları ilə təltif olunub.
Qeyd edək ki, "Şəhidin səsi" proqramının Məhəmməd Şəbiyevin əziz xatirəsinə həsr olunan növbəti buraxılışı bu gün – 3 avqust saat 18:00-da yayımlanacaq.
Verilişin aparıcısı "Tehsil365" İnformasiya Agentliyinin "Könüllü müxbir" layihəsinin könüllü müxbiri Ramidə Əliyeva olacaq.
Allah bütün şəhidlərimizə rəhmət eləsin, ruhları şad olsun!