2026/2027-ci tədris ili üzrə 1 nömrəli Bakı Tibb Kollecinin “Müalicə masajı” ixtisasına gözdən əlil abituriyentlər üçün 15 dövlət sifarişli plan yeri ayrılıb.
Bu barədə "Tehsil365"ə Dövlət İmtahan Mərkəzindən məlumat verilib. Bildirilib ki, əlillərin cəmiyyətə inteqrasiyasının təmin edilməsi və onların məşğulluq səviyyəsinin artırılması məqsədilə 2014/2015-ci tədris ilindən etibarən sözügedən ixtisas üzrə gözdən əlil gənclər üçün dövlət hesabına plan yerləri ayrılır.
Bildirilib ki, həmin yerlər üzrə müsabiqədə iştirak etmək istəyən, orqanizmin funksiyalarının 81–100 və 61–80 faiz pozulmasına görə gözdən əlilliyi (I və II dərəcəli gözdən əlil) müəyyən edilmiş abituriyentlər 2026-cı il avqustun 5-dən 14-dək (saat 17:00-dək) Tibbi Sosial Ekspert Komissiyaları tərəfindən verilən əlilliyi təsdiq edən arayışı, yaşadıqları ərazi üzrə poliklinikadan “Peşəyə yararlılıq haqqında” tibbi arayışı (AZS №086) və “Abituriyentin elektron ərizəsi”ni Dövlət İmtahan Mərkəzinə (Bakı şəhəri, Nəsimi rayonu, Akademik Həsən Əliyev küçəsi, 299) və ya DİM-in regional bölmələrinə təqdim etməlidirlər.
Müsabiqədə cari ilin məzunları üçün buraxılış imtahanından ümumi balı 50-dən, Azərbaycan dili və riyaziyyat fənlərinin hər biri üzrə balı 10-dan az olmayan abituriyentlər iştirak edə bilərlər. Xarici dil fənni üzrə bal məhdudiyyəti tətbiq edilmir.
Qeyd edək ki, tam (11 illik) orta təhsil bazasında orta ixtisas təhsili müəssisələrinə qəbul olmaq üçün ixtisas seçimi və digər prosedurlar Dövlət İmtahan Mərkəzi tərəfindən müəyyən edilmiş qaydalara uyğun həyata keçirilir.