Xaricdə təhsil yalnız diplom əldə etmək deyil, eyni zamanda, ölkəni layiqincə təmsil etmək və qazanılan bilikləri Vətənin inkişafına yönəltməkdir.
“Tehsil365” xəbər verir ki, bu sözləri Dövlət Proqramı məzunu Aydan Poladova 2026/2027-ci tədris ili üzrə Dövlət Proqramı qalibləri ilə görüşdə deyib. O bildirib ki, iki il əvvəl Dövlət Proqramının iştirakçısı kimi bu görüşdə əyləşən gənclərdən biri olub: “Bu gün isə qazandığım təcrübəni proqramın yeni qalibləri ilə bölüşmək imkanı əldə etmişəm. Azərbaycan Tibb Universitetində müalicə işi ixtisası üzrə bakalavriat təhsilimi başa vurduqdan sonra Dövlət Proqramının dəstəyi ilə Böyük Britaniyanın London İmperial Kollecində ictimai səhiyyə ixtisası üzrə magistratura təhsili almışam. Hazırda Səhiyyə Nazirliyi Aparatının İctimai səhiyyə və xəstəliklərə nəzarət şöbəsində aparıcı məsləhətçi vəzifəsində çalışıram. Xaricdə təhsil müddətində qazandığım bilik və bacarıqlar səhiyyə siyasəti, səhiyyə sistemlərinin idarə olunması və əhalinin sağlamlığının qorunmasına baxışımı dəyişdi. Bu gün həmin bilik və təcrübəni gündəlik peşə fəaliyyətimdə tətbiq edirəm”.
Aydan Poladova vurğulayıb ki, xaricdə təhsilin ilk mərhələsində yeni akademik sistemə, akademik yazı və tənqidi düşüncə tələblərinə uyğunlaşmaq müəyyən çətinliklər yaratsa da, müəllimlər və tələbələrlə sıx ünsiyyət, universitetlərin təqdim etdiyi imkanlardan maksimum istifadə bu prosesi asanlaşdırır.
Dövlət Proqramı məzunu proqram qaliblərinə universitet həyatında yalnız auditoriya ilə kifayətlənməməyi, müxtəlif layihələrdə və təşəbbüslərdə fəal iştirak etməyi, yeni insanlarla tanış olmağı və sual verməkdən çəkinməməyi tövsiyə edib. Bu təcrübələr həm peşəkar, həm də şəxsi inkişaf baxımından mühüm əhəmiyyət daşıyır.
Xaricdə təhsil alan hər bir gənc öz uğur hekayəsini yazmaqla yanaşı, Azərbaycanı da təmsil edir. O qeyd edib ki, London İmperial Kollecində fəaliyyət göstərən Azərbaycan Cəmiyyətinin vitse-prezidenti kimi müxtəlif tədbirlərin təşkilində iştirak edib, Diasporla İş üzrə Dövlət Komitəsinin dəstəyi ilə keçirilən tədbirlərdə ölkənin mədəni irsinin və milli dəyərlərinin tanıdılmasına töhfə verib.