Xaricdə təhsil alan gənclər Azərbaycanın təmsilçisi olduqlarını unutmamalı, ölkələri haqqında formalaşan təsəvvürə davranışları və fəaliyyətləri ilə töhfə verməlidirlər.
“Tehsil365” “AZƏRTAC”a istinadən xəbər verir ki, bu fikri Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdir müavini Ayla Həsənova 2026/2027-ci tədris ili üzrə Dövlət Proqramı qalibləri ilə görüşdə söyləyib. O bildirib ki, Dövlət Proqramının seçim meyarlarında namizədlərin kommunikasiya, özünüifadə və qarşı tərəfi inandırmaq bacarıqlarına xüsusi önəm verilməsi təsadüfi deyil. Xaricdə təhsil alan gənclər təkcə akademik nailiyyətləri ilə deyil, həm də davranışları və ünsiyyətləri ilə Azərbaycan haqqında müsbət rəy formalaşdırırlar. Təmsilçilik yalnız tribunadan çıxış etmək deyil, gündəlik davranış, nizam-intizam, komanda işi, akademik etika və peşəkar münasibətlərdə də özünü göstərir. Proqram iştirakçılarının tədqiqat fəaliyyəti, əməkdaşlıq bacarıqları və əldə etdikləri nəticələr Azərbaycan gəncləri haqqında təsəvvürün formalaşmasına təsir edir.
Ayla Həsənova təmsilçiliyin üç səviyyədən ibarət olduğunu diqqətə çatdırıb. O bildirib ki, bunlar şəxsi təmsilçilik, akademik və peşəkar təmsilçilik, həmçinin ictimai təmsilçilikdir. Bu üç istiqamətdə düzgün davranış Azərbaycanın müasir və obyektiv şəkildə tanıdılmasına xidmət edir.
Şöbə müdirinin müavini gənclərə müşahidə aparmağı, fərqli mədəniyyətləri öyrənməyi tövsiyə edib.