“Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı”na müraciət edən namizədlərin bilik və bacarıq səviyyəsi ildən-ilə yüksəldiyi üçün seçim prosesi də çətinləşir.
“Tehsil365” “AZƏRTAC”a istinadən xəbər verir ki, bu sözləri Azərbaycan Respublikası Dövlət Neft Fondunun icraçı direktorunun müavini Rövşən Cavadov 2026/2027-ci tədris ili üzrə Dövlət Proqramı qalibləri ilə görüşdə deyib. O bildirib ki, builki proqram çərçivəsində seçilən 500 nəfər minlərlə namizəd arasından ölkəni xaricdə layiqincə təmsil etməyə ən layiqli gənclərdir. Süni intellektin, texnologiyaların və iqtisadiyyatın sürətli inkişafı yeni peşələrin yaranmasına səbəb olur. Bu baxımdan əsas məqsəd yalnız nüfuzlu universiteti bitirmək deyil, həmin ali təhsil müəssisələrində müasir bilik və bacarıqlara yiyələnmək, yeni texnologiyaları mənimsəmək, dəyişikliklərə uyğunlaşmaq və öyrənmək həvəsini qoruyub saxlamaqdır.
Rövşən Cavadov vurğulayıb ki, beynəlxalq təcrübəyə görə, uğurlu ölkələri fərqləndirən əsas amil təbii resurslar deyil, insan kapitalına qoyulan investisiyadır. Sinqapur və Cənubi Koreya kimi ölkələrin inkişafının əsas səbəbi təhsilə və insan kapitalına yönələn uzunmüddətli dövlət siyasətidir. Azərbaycan da bu yolu seçərək hər il yüzlərlə gəncin dünyanın nüfuzlu ali məktəblərində təhsil almasına şərait yaradır. Bəzi ölkələrdə oxşar proqramlar yalnız müəyyən ixtisasları və ya məhdud sayda tələbəni əhatə etdiyi halda, Azərbaycanda Dövlət Proqramının əhatə dairəsi daha genişdir.
İcraçı direktorun müavini qeyd edib ki, hazırda Dövlət Neft Fondu üç təhsil layihəsini maliyyələşdirir: “Bunlar Xaricdə Təhsil üzrə Dövlət Proqramı, ali təhsil sisteminin beynəlxalq rəqabətliliyinin artırılması üzrə Dövlət Proqramı və Prezidentin müvafiq Sərəncamına uyğun olaraq bu ildən maliyyələşdirilməsinə başlanılan peşə təhsilinin səviyyəsinin artırılması layihəsidir. Bu, dövlətimizin başçısının təhsilə və insan kapitalının inkişafına verdiyi önəmin göstəricisidir. Dövlət Neft Fondunun əsas missiyası təbii sərvətlərdən əldə olunan gəlirlərin həm bugünkü, həm də gələcək nəsillərin rifahına yönəldilməsidir. Bu baxımdan insan kapitalına qoyulan investisiya ölkənin uzunmüddətli inkişafı üçün ən səmərəli sərmayə hesab olunur”.
O qeyd edib ki, bu günədək Dövlət Neft Fondu təhsil proqramlarına 800 milyon manatdan çox vəsait ayırıb və yaxın illərdə bu istiqamətdə maliyyələşmənin həcminin daha da artırılması nəzərdə tutulur.