Müəllimlərin şəxsi etibarını və peşəkar nüfuzunu qorumaq üçün riayət etməli olduqları davranış qaydaları açıqlanıb.
“Tehsil365” xəbər verir ki, bu mövzu ilə bağlı təhsil eksperti Qoşqar Məhərrəmov sosial media hesabında paylaşım edib.
Ekspert müəllimlərin heç bir halda şagirdlə məktəbdən kənarda fərdi şəkildə görüşməməli olduğunu bildirib. Onun sözlərinə görə, müəllimlər şagirdləri şəxsi avtomobilləri ilə bir yerdən başqa yerə aparmaqdan da çəkinməlidirlər.
Qoşqar Məhərrəmov qeyd edib ki, müəllim və şagird arasında hər hansı ünsiyyət zamanı valideynin də prosesdə iştirakı təmin olunmalıdır. O, bunun üçün valideyn, müəllim və şagirddən ibarət ortaq ünsiyyət mühitinin yaradılmasını məqsədəuyğun hesab edib.
Ekspert, həmçinin müəllimlərin şagirdlərin xarici görünüşü ilə bağlı müsbət və ya mənfi fikir bildirməsinin, eləcə də hər hansı şagirdə xüsusi diqqət və ya diqqətsizlik göstərməsinin düzgün olmadığını vurğulayıb.
Paylaşımda daha bir vacib məqama toxunan təhsil eksperti bildirib ki, müəllimlər bu kimi hallarla qarşılaşdıqda ilk növbədə məktəb rəhbərliyini məlumatlandırmalı, rəhbərlik tərəfindən lazımi tədbir görülmədiyi halda isə məsələni hüquq-mühafizə orqanlarına və aidiyyəti yuxarı instansiyalara çatdırmalıdırlar.