“Tarixin dərinliklərindən bəri hər dövrdə gənc nəsil, gənclik xalqların, millətlərin ən önəmli güc mərkəzi olmuşdur. Onların nə ilə məşğul olması, hansı istiqamətdə addım atması xalq üçün çox böyük önəm kəsb edib”.
Bu sözləri “Tehsil365”ə açıqlamasında ilahiyyatçı Ağa Hacıbəyli bildirib.
İlahiyyatçı bildirib ki, hazırkı dövrümüzdə də gəncliyin böyük əhəmiyyət kəsb edən yolu təqib olunur.
“Hazırkı dövrümüzdə də gəncliyin belə bir böyük əhəmiyyət kəsb edən yolu təqib olunur. Özəlliklə süni intelelktin, rəqəmsallığın ortaya çıxdığı internet əsrində, atom dövründə yaşayırıq. Əlbəttə ki, bu dövrün gənc nəslinin əlindəki imkanlar dünənki nəslin, yəni keçmişimizin nəsillərindən kifayət qədər fərqlənir. Dünən kitabxanalarda böyük zaman sərf edərək məlumatlar əldə edilirdisə, bu gün bir nöqtəyə toxunmaqla həmin informasiya ovcumuzun içərisindən gözümüzün qarşısına çıxır və onu dinləyə, ala və götürə bilirik”.
Onun sözlərinə görə, texnologiyanın bu qədər mütərəqqi inkişafı müəyyən bir qaynağa çevrilib.
“Texnologiyanın bu qədər mütərəqqi inkişafı bir tərəfdən çox böyük bir rəhmət qaynağı, digər tərəfdən özü ilə bərabər ciddi risklər gətirən bir qaynağa çevrilib. Bəzən mənbələr doğru, düzgün təhlil edilmədən din kimi təqdim olunur, bəzən də müxtəlif dini dəyərləri təhrif etmək istəyən zehniyyətlər bu vasitəni çox önəmli hesab edərək dezinformasiyalarını, yanlış məlumatlarını müxtəlif məqalələr vasitəsilə gənc nəslin beyninə bombardman edir”.
İlahiyyatçı vurğulayıb ki, bizim gənc nəslimiz bir şey unutmamaq şərtilə əlindəki bu resurslardan istifadə etməyə çalışacaq.
“Hesab edirik ki, bizim gənc nəslimiz bir şeyi unutmamaq şərtilə əlindəki bu resurslardan, imkanlardan istifadə etməyə çalışacaq. Bizim əxlaqi-mənəvi dəyərlərimiz həmişə bütün aldığımız informasiyaların təməli hesab olunmalıdır. Çünki gəncin dünyagörüşü, onun iman çərçivəsi nə qədər çox böyük, sabit olarsa, o gənc daha çox tərəqqi edə bilər. Əks təqdirdə, zəmanənin hər addımbaşı günah sektorları ilə baş-başa qaldığı bir yerdə həm böyük bir zaman itkisi ilə üzləşər, həm də bir çox gənclər də buradan aldıqları mənəvi yaralarla, zərbələrlə bəzən aylarla, illərlə özlərinə gələ bilməzlər. Bu baxımdan gənc nəslə tövsiyəmiz ondan ibarətdir ki, mənsub olduqları mənəvi dəyərləri heç zaman nə qədər böyük olsa belə, kənar maddiyatla dəyişməməlidirlər”.