"Ötən iki ildə qrant layihəsi kimi icra olunan məktəbəqədər təhsil modeli artıq hüquqi əsaslarla tətbiq ediləcək".
“Tehsil365” xəbər verir ki, bunu Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu “Məktəbəqədər təhsildə valideyn-dövlət-özəl əməkdaşlığı əsasında maliyyələşmə müsabiqəsinə özəl bağçaların sənəd qəbulunun başlaması” ilə bağlı jurnalistlərə açıqlamasında deyib.
Onun sözlərinə görə, əvvəlki qrant layihəsinin həm əhatə dairəsi məhdud idi, həm də hüquqi əsası yox idi:
"Qrant layihəsi çərçivəsində son ildə 4 mindən bir qədər çox uşağın təhsilinə maliyyə dəstəyi göstərə bilmişdik. Lakin bu modelin hüquqi əsası mövcud deyildi. Hazırda isə Prezidentin Fərmanı və onun əsasında qəbul edilmiş Nazirlər Kabinetinin qərarı "Valideyn-Dövlət-Özəl" əməkdaşlığı modelini məktəbəqədər təhsilin hüquqi tərkib hissəsinə çevirib. Bu da daha çox uşağın dövlət dəstəyindən yararlanmasına imkan yaradacaq.
Məktəbəqədər təhsil icbari olmadığından valideynlər bəzən uşaqlarını 2-3 ay bağçaya göndərib sonra çıxarırlar. Buna görə də maliyyələşmə əvvəlcədən bir il üçün deyil, aylıq əsasda həyata keçiriləcək. Uşaqların davamiyyəti mütəmadi izlənəcək və dövlət öz üzərinə düşən ödənişi hər ay köçürəcək. Müqavilələr 10 aylıq olacaq. Yay aylarında valideynlərin məzuniyyətə çıxması və digər səbəblərlə uşaqların bağçaya davamiyyəti azaldığı üçün bu müddət nəzərə alınıb.
Məktəbəqədər Təhsil İnformasiya Sistemində qeydiyyatda olan hər bir özəl bağça qəbul edə biləcəyi uşaq sayını göstərir. Dövlət dəstəyi yalnız yeni qəbul olunan uşaqlara şamil ediləcək. Əgər uşaq bağçanı dəyişərsə, yeni müəssisədə növbəyə daxil ediləcək və boş yer yarandıqda növbəlilik prinsipi əsasında yerləşdiriləcək".