Skripka ifaçılığı və dirijorluq sənətində özünəməxsus fəaliyyəti ilə seçilən Sərvər Qəniyev zəngin yaradıcılıq yolu keçmiş sənətkarlardandır. Onun ifaçılıq fəaliyyəti, pedaqoji irsi və musiqi təhsilinin inkişafı istiqamətində gördüyü işlər Azərbaycan mədəniyyətində mühüm yer tutur. Yüksək peşəkarlığı və sənətə bağlılığı ilə tanınan musiqiçi uzun illər ərzində həm konsert səhnəsində, həm də ali musiqi təhsili sahəsində fəaliyyət göstərərək gənc ifaçıların yetişdirilməsinə mühüm töhfələr verib.
“Tehsil365” xəbər verir ki, bu gün skripkaçı və dirijor, Xalq artisti Sərvər Qəniyevin anadan olmasının 89-cu ildönümü tamam olur.
Sərvər Qəniyev ilk musiqi təhsilini Azərbaycan Konservatoriyasının nəzdindəki musiqi məktəbində skripka aləti üzrə alıb. Hələ gənc ikən Sərvər Qəniyev Niyazinin rəhbərlik etdiyi Üzeyir Hacıbəyli adına Dövlət Simfonik Orkestri ilə birlikdə çıxış edərək, musiqi ictimaiyyətinin rəğbətini qazanıb. Azərbaycan Dövlət Konservatoriyasına daxil olan musiqiçi ikinci kursdan etibarən peşəkar musiqi təhsilini Pyotr Çaykovski adına Moskva Dövlət Konservatoriyasında davam etdirib. 1960-cı ildə konservatoriyanı bitirdikdən sonra o, həmin ali təhsil ocağının aspiranturasında öz peşə kamilliyini artırıb.
1963-cü ildə Bakıya qayıdan musiqiçi Azərbaycan Dövlət Konservatoriyasında müəllim və Azərbaycan Dövlət Filarmoniyasının solisti kimi çalışmağa başlayıb. 1965-ci ildə Sərvər Qəniyevin təşəbbüsü ilə konservatoriyanın nəzdində simli kvartet yaradılıb və 1979-cu ildən bu kvartet filarmoniyanın nəzdində uğurla fəaliyyət göstərib.
Azərbaycana qayıdandan sonra musiqiçi zəngin konsert proqramları ilə çıxış etməklə yanaşı, Dövlət Konservatoriyasının professoru və kafedra müdiri vəzifəsini tutub. 1991-ci ildən ömrünün sonunadək o, Türkiyənin Bilkənd Universitetinin skripka kafedrasının professoru, kamera və simfonik orkestrinin bədii rəhbəri və dirijoru olub.
Musiqi sənəti sahəsindəki xidmətlərinə görə Sərvər Qəniyev 1967-ci ildə Əməkdar artist", 1982-ci ildə isə "Xalq artisti" fəxri adlarına layiq görülüb. O, 2007-ci ildə "Şöhrət" ordeni ilə təltif olunub.
Sərvər Qəniyev 2010-cu il sentyabrın 5-də Türkiyənin Ankara şəhərində vəfat edib.