Cəfər Cabbarlı adına Respublika Gənclər Kitabxanasında Azərbaycan xalqının zəngin mədəni irsinin, xüsusilə də xalçaçılıq sənətinin öyrənilməsi və təbliği istiqamətində mühüm işlər həyata keçirən görkəmli xalçaçı-rəssam, Xalq rəssamı, sənətşünas-alim və pedaqoq Lətif Kərimovun 120 illik yubileyinə həsr olunmuş elektron məlumat bazası hazırlanıb.
“Tehsil365” xəbər verir ki, Xalq rəssamı Lətif Kərimov – 120” adlı elektron məlumat bazası milli xalçaçılıq sənətimizin görkəmli nümayəndəsinin əziz xatirəsinin yaşadılması və onun zəngin irsinin gənclər arasında təbliği məqsədilə yaradılıb.
Hazırlanan elektron baza görkəmli sənətkarın zəngin irsinin rəqəmsal formatda sistemləşdirilməsi, qorunması və geniş oxucu auditoriyasına təqdim edilməsi baxımından xüsusi əhəmiyyət daşıyır. Elektron məlumat bazasında Lətif Kərimovun həyat və fəaliyyətini əhatə edən müxtəlif istiqamətlər üzrə məlumatlar toplanıb.
Bazada Xalq rəssamının müəllifi, redaktoru olduğu, tərtib etdiyi, ön söz yazdığı Azərbaycan və rus dillərində nəşr olunan kitabları, məqalələri, haqqında qələmə alınan nəşrlər və dövri mətbuat nümunələri, izomateriallar, Lətif Kərimovun layiq görüldüyü təltif və mükafatlar haqqında məlumatlar təqdim edilir. Kitabxana əməkdaşları tərəfindən hazırlanan bazada sənətkarın həyat yolu, yaradıcılıq fəaliyyəti, elmi irsi, xalçaçılıq sahəsindəki araşdırmaları haqqında qələmə alınan “Xalçaçılıq sənətimizin Lətif Kərimov zirvəsi”, “Azərbaycan xalçaçılıq tarixinin Lətif Kərimov səhifəsi”, “Naxışlarda əbədiləşən rəssam ömrü” kimi məqalələrin tam mətni yer alır. Məlumat bazasında “Xatirəsinin əbədiləşdirilməsi”, “Virtual sərgi”, “Filmoqrafiya”, “Foto və videoqalereya” bölmələri də mövcuddur.
Elektron məlumat bazası kitabxananın rəsmi saytında yerləşdirilib.