“Bakı şəhərində motosikletlərin və motosiklet sürücülərinin dəqiq siyahısı hələ yoxdur. Bizdə demək olar ki, ümumiyyətlə, motosiklet sürmə mədəniyyəti, məqsədi, müəyyən təhlükəsizlik problemləri çox aşağı səviyyədədir”.
Bu sözləri “Tehsil365”ə açıqlamasında nəqliyyat eksperti Fərhad Əyyubov bildirib.
Ekspert bildirib ki, yollarımız motosiklet sürməkdən ötəri müəyyən təhlükəsizlik nöqteyi-nəzərdən ürəyaçan deyil.
“Yollarımız motosiklet sürməkdən ötəri müəyyən təhlükəsizlik nöqteyi-nəzərdən o qədər də ürəyaçan deyil. Bu baxımdan son zamanlarda velosiped, skuterlər üçün ayrıca zolaqlar ayrılıb. Motosiklet sürücüləri isə bu təhlükəsizlik məsələlərinə düzgün əməl etməlidirlər”.
Onun sözlərinə görə, hazırda motosiklet sürənlər motosikletdən məqsədli formada istifadə etmirlər.
“Hazırda motosiklet sürənlər məqsədli formada deyil, özlərinin işləri üçün və yaxud da müəyyən firmalar tərəfindən daşıyıcılar kimi istifadə olunur. Motosikletlərin bəzilərinin, müəyyən litrajdan aşağı olanlarının nömrələri də yoxdur. Bakı şəhəri üçün isə bu böyük əhəmiyyət kəsb edir və hiss edirlər ki, təhlükəsizlik problemləri motosiklet, moped sürənlərdə daha öndə olur. Motosikletlərin piyadalarla toqquşması nəticəsində ölüm halları, qəza halları, başqa piyada ölümləri də baş verir”.
Ekspert vurğulayıb ki, bu problemləri həll etmək üçün müəyyən işlər görülür.
“Hazırda baş verən bu cür mənfi problemləri həll etmək üçün müəyyən işlər görülür və görüləcək. Əlbəttə, ən öndə gedən məsələ təhlükəsizlik məsələsidir. Yol hərəkətinin təşkilinin 2 mühüm məqsədi vardır. Onun birincisi, müəyyən optimal sürəti əldə etmək, ikincisi təhlükəsizliyi tam təmin etməkdir. Yol hərəkətin təşkili dedikdə bütün nəqliyyat vasitələri nəzərdə tutulur. Bura eyni zamanda motosiklet, mopedlər, hətta velosipedlər daxildir. Son zamanlarda isə motosikletlərin də texniki müayinədən keçirilməsi nəzərdə tutulur”.