Müasir dövrdə təhsil sistemində mənəvi-əxlaqi tərbiyənin yeri, şagird və tələbələrdə intizam mədəniyyətinin formalaşdırılması və bu sahədə qlobal modellərin tətbiqi məsələsi aktuallığını qoruyur.
Mövzu ilə bağlı ilahiyyatçı Fazil Əhmədli “Tehsil365”-ə öz xüsusi açıqlamasını verib.
İlahiyyatçı bildirib ki, hazırda təhsil sistemində tərbiyə komponentinin gücləndirilməsinə böyük ehtiyac var:
"Azərbaycan təhsilinin bu mövzuya çox böyük ehtiyacı var. İctimai xadimlərin iştirakı ilə bu məsələnin geniş konfranslarda müzakirə olunmasını və təsirli qərarların qəbul edilməsini çox arzulayardım. Çünki hazırda təhsilimiz daha çox yalnız təlim xarakteri daşıyır. Əvvəllər 'təlim-tərbiyə' anlayışı var idi və burada etik qaydaların uşaqlara kiçik yaşlardan öyrədilməsi önəmli yer tuturdu. İndi sistem dəyişib və qloballaşan cəmiyyətin tələblərinə uyğun olaraq tərbiyə sistemində yeni, müasir metodlardan istifadə olunmalıdır."
Fazil Əhmədli dünyada tətbiq olunan uğurlu intizam modellərindən və Şərq təcrübəsindən misal çəkib:
"Məsələn, hal-hazırda dünyada Çin və Yaponiya təhsil modelləri xüsusilə qabardılır. Onların təhsil sistemində tərbiyə və intizam qaydaları elə kiçik yaşlardan öyrədilir ki, bu, tələbəlik dövrünədək artıq bir norma xarakteri alır. Bu intizam həm şagirdlərin bir-birilə, həm müəllimlə, həm də cəmiyyətlə münasibətində özünü göstərir. Uşaqlıqda aşılanan bu intizam mədəniyyəti sonradan onların istehsalat, sənaye və kənd təsərrüfatı kimi sahələrdəki fəaliyyətində də addım-addım qorunub saxlanılır və nümunəvi nəticələr verir."
Ekspert vurğulayıb ki, Azərbaycanda da təhsil sisteminə bu cür intizam qaydaları ilə yanaşı, İslam əxlaqı və milli-mənəvi dəyərlər sistematik şəkildə daxil edilməlidir:
"Müsəlman ölkəsi olaraq İslamın da əxlaq və etika mövzusunda xeyli mühüm prinsipləri var. Sovet dövrünün görkəmli pedaqoqları, məsələn Fikrət Seyidov kimi alimlər də yaxşı bilirdilər ki, İslamın tərbiyə və əxlaq qaydaları gənclərin yaxşı bir vətəndaş kimi yetişməsində stimulverici rol oynayır. Düşünürəm ki, həm Şərq ölkələrinin intizam modelləri, həm də öz milli-dini əxlaq dəyərlərimiz təhsil sisteminə sistematik daxil edilərsə, Azərbaycan bu sahədə nümunəvi bir ölkəyə çevrilə bilər."
Sonda Fazil Əhmədli cəmiyyətimizin etik dəyərlərə bağlılığını psixoloji nöqteyi-nəzərdən dəyərləndirib:
"Cəmiyyətimizin kökündə əxlaqi və etik qaydalara dərin bir bağlılıq var. Müşahidə edirəm ki, digər cəmiyyətlərlə müqayisədə bizim xalqımız ictimai etikaya daha həssas yanaşır. İctimaiyyət arasında qeyri-etik ifadələrin işlədilməsinə cəmiyyətimiz hələ də mənfi reaksiya verir və bu sərhədləri qoruyur. İstərdim ki, bu etik dəyərlərə bağlılıq gələcək illərdə də özünü qorusun və təhsil sistemimiz vasitəsilə daha da inkişaf etdirilsin."