Müasir ali təhsil sistemində nəzəriyyə ilə praktika arasındakı uyğunsuzluq, kadr hazırlığının əmək bazarının tələbləri ilə üst-üstə düşməməsi günümüzün ən aktual məsələlərindən biridir.
Mövzu ilə bağlı təhsil eksperti Qoşqar Məhərrəmov “Tehsil365”-ə öz xüsusi açıqlamasını verib.
Ekspert bildirib ki, ilk növbədə ali təhsil müəssisələrinin rəhbərliyinin yanaşması dəyişməlidir:
"Əsas məsələ ali təhsil müəssisələrinin rəhbərliklərinin yanaşmasının dəyişməsidir. Universitet rəhbərlikləri təhsilin qərarverici orqanı olan Elm və Təhsil Nazirliyi ilə sıx müzakirələr aparmalı, ali təhsilə ayrılan büdcələrə yenidən baxılmalı və bu vəsaitlər artırılmalıdır. Eyni zamanda müəllim heyəti nəzərdən keçirilməlidir. Müasir standartlara cavab verən, ingilis dilini və informasiya texnologiyalarını yaxşı bilən, doktorantura dərəcəsi olan kadrlar prosesə cəlb olunarsa, ali təhsil mühiti köklü şəkildə dəyişər. Müəllim və rəhbərlik heyəti məsələyə müasir tələblər çərçivəsində yanaşdıqda, təbii ki, təqdim olunan təhsilin keyfiyyəti də yüksələcəkdir."
Qoşqar Məhərrəmov vurğulayıb ki, nəzəriyyədən praktiki mühitə keçid üçün universitet-sənaye əməkdaşlığı mütləqdir:
"Ali təhsil müəssisələrində praktikanın uğurlu olması və təhsilin yalnız nəzəriyyədən ibarət qalmaması üçün sənaye ilə sıx əməkdaşlıq lazımdır. Universitetlərdə tətbiqi laboratoriyalar və müasir texnoloji mühit yaradılmalıdır. Sənaye ilə əməkdaşlıq əmək bazarının real tələblərini öyrənməyə imkan verəcək. Bu tələblər bəlli olduqdan sonra onların ali məktəb mühitində necə reallaşdırılacağı da aydın olacaq. Tələbələr sənaye müəssisələrinin təcrübə proqramlarına qoşula bilsələr, öyrənilən ixtisas və elm real dəyər qazanacaq."
Ekspert hazırda universitetlər və sənaye sektoru arasında qarşılıqlı narazılıq və ziddiyyətlərin olduğunu diqqətə çatdırıb:
"Düşünürəm ki, hazırda tərəflər arasında ciddi bir qopuqluq var. Universitetlər sənaye haqqında, sənaye də universitetlər haqqında yetərli məlumata malik deyil. Bəzi universitetlər bildirir ki, sənayenin tələb etdiyi kadrla onların yetişdirdiyi tələbə arasında fərq var və ya yetişdirdikləri yüksək ixtisaslı kadrlar üçün sənayedə müvafiq mühit yoxdur. Sənaye tərəfi isə iddia edir ki, universitetdə verilən biliklər onların axtardığı müasir standartlara cavab vermir. Belə bir təzadlı vəziyyət yaranıb."
Sonda Qoşqar Məhərrəmov bu ziddiyyətin həlli yolunu açıqlayıb:
"Bu problemin yeganə həll yolu tərəflərin bir araya gəlməsi, sıx диалог, gəliş-gedişlər və institusional əməkdaşlıq mühitinin qurulmasıdır. Yalnız bu halda təhsildə nəzəriyyə ilə praktika arasındakı uyğunsuzluğu aradan qaldırmaq mümkün olacaq."